Shillong, Naiwieng 10
U majistor ha ka Sngi U Blei u la pyntip ba u Vice-Chancellor (VC) ka North-Eastern Hill University (NEHU), Prof. Prabha Shankar Shukla um don shuh ha ïingsah jong u.
Ha kajuh ka por, u la ïathuh ba ka ïingsah u VC ka la shah pynjulor ha ka miet hashuwa, ha kawei ka liang kaba la ïalam sha ka jingwan poi jong ki pulit ha ka skulbah.
Haba kren sha ki samla pule kiba la ïalum lang hakhmat ïingsah u VC, u majistor u la pynsngew ba ïa ki jingdawa jong ki samla pule la pynsngew sha ki bor ba halor, hynrei haba ki samla pule ki la kylli balei u VC um mih shabar ban ïakren, u (majistor) la ong, “Nga la ong ïa phi ba ngam lap ïa u VC hapoh.”
Na ka liang ki samla pule ki la dawa ban leit peit ïa ka ïingsah u VC lem bad ki lad pathai khubor bad pynsngew ruh ba lada um (VC) don, kata ki lah ban ujor da ka ejahar.
“U Chief Security Officer bad ka kynhun jong u ki don hynrei kim shym lap. Kane mynta ka la kylla long ka jaka jong ka jingjia ka kam be-aiñ…ka la don ka jingpynjulor hynnin ka miet. Ngim shah shuh ba phin leit mynta,” ong u majistor uba don ha katei ka jaka.
“Kumta ban pyntikna ban ym don shuh kino-kino ki jingjulor ïa ki jingdon-jingem paidbah ne jingmynsaw ïano-ïano, nga donkam ïa ka jingkular na ki nongpynïaid ban ym jia eiei shuh,” u la ong.
Ha kawei ka liang, uwei na ki samla pule ha katei ka jaka u la ïathuh ba la ïoh jingtip na u Security Officer jong u VC ba um don shuh naduh kumba 2 baje mynstep.
Haba kdew ba ki samla kin ap ïa ka ejahar halor katei ka bynta, u la ong, “Ngin ap ïa ka ejahar namar u Security Officer u la don lypa hangne bad u la ai jingkular ba la palat 24 kynta bad kumta ngi dawa ba u dei ban ai ka ejahar ba u la jah. Ngi la ïoh ka jingtip na ki bad ki la ong ba u la jah khlem kano-kano ka ‘Leave Application’.”
Shuh shuh katei ka jingshah pynjulor ka ïingsah u VC bad ka jingbym don shuh jong u ha ïingsah ka la paw pyrthei hadien ka jingïakhih ïaid paidbah sha ïingsah u VC ba la pynlong da ka NEHU Research Scholars’ Forum (NRSF) ha ka Sngi U Blei.
Ki nongïakhih ha kane ka sngi ki la rah ruh ïa ki ‘Placard’ ha ryngkat ka jingpyrta ïa ki sur pynrem ïa u VC ka skulbah, hynrei na ka liang ki pulit ki la khang noh ïa ki ban tur sha katei ka jaka.
