Jowai, Naiwieng 10
Uwei u briew u la shah kem noh ha ki pulit jong ka thanat Nartiang halor ka jingkynnoh ba u la donkti ban leh be-ijot ïa kawei ka khynnah kaba dang 10 snem rta ha kawei ka shnong ha West Jaiñtia Hills District.
Halor kane ka jingjia na ka liang ki bahaïing-bahasem ki la ujor da ka ejahar ha ka 9 tarik Naiwieng ha u Officer Incharge ka thanat Nartiang, West Jaiñtia Hills District.
Katkum ka ejahar, la ïathuh ba kane ka jingjia ka la jia ha ka 8 tarik Naiwieng katba kane ka khynnah ka dang don marwei ha ïing ha ka por ba ka kmie jong ka, ka dang leit sha jaka bylla.
Une u runar u la rung ha ïingsah jong katei ka khynnah kaba don kham sha kyndong ban leh ïa kane ka kam bad byrngem pynïap ruh ïa ka bad ïa ka kmie jong ka lada ka ïathuh briew.
Ha ka sngi kaba bud, kata ha ka 9 tarik Naiwieng, ki pulit ka Nartiang ryngkat ka jingïatreilang bad ka Meghalaya Indigenous Women’s Council (MIWC) kumjuh ki bor pynïaid shnong ki la ïoh ban kem noh ïa une u briew ba donkti ha kane ka kam bymman.
Ka Kong Bythygrace Dkhar, President ka MIWC ka la pynrem jur ïa utei u briew bad dawa na ki bor ka aiñ ban set patok shi jingim khlem da ai jamin shuh ïa u lym kumta kan don ka jingshong syier ïa ka thaiñ baroh kawei.
