Shillong, Naiwieng 10
Ha ka step jong ka Sngi U Blei, ki runar bym lah ban ithuh ne tip ki dei kiei, ki la pynjulor ïa ka ïingsah (quarter) jong u Vice Chancellor (VC) ka skulbah North Eastern Hill University (NEHU).
Katkum ki dur khih (video) la ïohi ba ki runar ki la pynpait ïa ki ïit jong ki jingkhang da kaba kawang da ki maw bad ki khiew syntiew haduh ba baroh ki ïit ki la pait bad julor. La ïoh ban sakhi ba wat ka kali kaba don ïa u nombor ML05-H-4851 ruh ka la shah pynjulor hi khait.
Nalor kane, na ka liang ki runar bym lah ban ithuh, ki la wiang ding ruh wat ïa ki kor CCTV kiba la pyndait ha kane ka jaka bad la ïohi ba ka jingjulor ka la long kaba bun ym tang jong ki ïing hynrei wat ka jingpait jong ki pliang hapoh ka kamra shet jingshet.
Ka tyllong khubor ka la ïathuh ba na ka liang ki majistor bad ki pulit tang shu ïoh jingtip halor kane, mar-mar ki la leit ban kerkut noh ïa kane ka ïing bad ban ym shah ïano- ïano ruh ban rung sha kane ka jaka. Ha kaba ïadei bad kane ka jingjia, na ka liang jong ki pulit mynta ki la pynïaid shakhmat ïa ka jingtohkit ban thwet ïa ki briew kiba donkti ha kane ka kam pynjulor.
