Shillong, Naiwieng 10
Ka jingbret pathar ïa ki jaboh-jabaiñ ha ki lynti-syngkien khamtam haba don kano-kano ka jingïalum paidbah ka dei kaba ju jia man ka por.
Ka jingbret pathar ïa ki kot bad plastik ka la jia ruh ha ka Sngi U Blei harud lynti bad harud surok da ki paidbah kiba ïaid lynti haba ki wan sha ka Procession Bah jong ka Shillong Archdiocese kaba long ha Laitumkhrah ha kaba da ki lak ngut ki paidbah ki poi ban ïashimbynta.
Ki rud surok bad ki lynti ïaid kjat ki la satah da ki kot lyngkhot bad ki plastik kiba la bret pathar da kito kiba bam ïa ki jingbam kiba song plastik, nalor ki bilor um plastik bad kiwei kiwei ki jingpynjaboh.
Naduh ki paidbah kiba ïaid lynti bad ki jaka ba die jingdie harud surok ha ki bynta bapher-bapher marjan bad ka thaiñ Laitumkhrah ki la pynsatah da ki jaboh khamtam eh ki plastik, ki song sikret, plastik song ‘wai-dong bad kiwei kiwei.
Kane ka jingleh khlemakor bad bym suitñiew ban sumar khuid ïa ki lynti-syngkien bad ki sawdong sawkun ka la jia wat haba na ka liang ka Balang Katholik bad ki nongpynïaid ki la ïai pynbna bad kyrpad khlem sangeh ïa ki paidbah ban ym pynjaboh ïa ki lynti bad surok hynrei ban bret ïa ki plastik ha ki jaka ba dei ban bret.
Ha shwa ban sdang ka Mass ha ka por mynstep haduh ban da bteng sa ka jingïaid Procession, ki nongpynïaid ka Balang ki la ïai pynbna khlem sangeh ïa ka jingkyrpad sha baroh kiba wan sha ka Procession Bah ban sumar khuid ym ban bret pathar ïa ki jaboh naduh ki plastik.
Kane ka jingpynjaboh ki paidbah khlem suitñiew ïa ka jingkyrpad jong ka Balang kan pynjynjar ïa ki nongpynïaid jong ka Balang kiba hap ban phah sar bad pynkhuid ïa ki jingpynjaboh ha kylleng ki jaka naduh ki jaka ba pynïeng kali ki nongwan Procession, ki rud surok ba bret pathar ïa ki song jingbam palstik, bilor plastik bad kiwei kiwei.
