Shillong, Naiwieng 10
Wat lada ki don kiba kheiñ troiñ ïa ka Congress bad ñiew ba ka dei ka seng kaba la tlot ha kane ka Jylla, hynrei ha ka jingpynkhreh ïa ka ilekshon MDC, bun ki paidbah ki dang phaikhmat sha kane ka seng kaba la ju synshar teng ïa ka Jylla, bad ha kiba bun tylli ki konstitwensi, ki don bun ngut kiba pan tiket ban ïakhun ïa ka ilekshon MDC.
Haba shu peit thuh ïa ka jinglong ka saiñ hima-sima, ka paw ba ka Congress ka kham tlot namar wat ki MLA kiba la jop na kane ka seng ki dang nud ban phet noh bad leit ïasoh bad kiwei pat ki seng saiñ pyrthei.
Hynrei wat haba ka Congress ka la duh ïa ki MLA, ki paidbah pat ki dang phaikhmat sha kane ka seng bad ki don ki konstitwensi ha kaba ki nongpan tiket ban ïakhun na ka Congress ki bun ngut bha.
Ki don ki konstitwensi ha kaba ki don lai ngut ki nongpan tiket na ka bynta ka ilekshon MDC, bad ki don pat ki konstitwensi kiba don kham bun ngut shuh shuh ki nongpan tiket.
Kum ha thaiñ Pynursla, ka tyllong khubor ka ïathuh ba ki don bun ngut bha kiba kwah ban pan tiket ban ïakhun na ka Congress ha ka ilekshon MDC, bad ki don ruh kiwei pat ki konstitwensi kiba don bun ngut bha kiba kwah ban pan tiket.
Dang shen, ki nongïalam ka Congress ki la ïathuh ba ki la don ruh bun ngut ki MLA barim bad MDC barim kiba kwah ban wanphai sha ka seng.
U President ka Congress, Bah Vincent H Pala dang shen u la ai ksai ba kin don bun ngut ki nongïalam bad ki nongtrei saiñ pyrthei na kylleng ki konstitwensi ha Khasi Jaiñtia bad Rilum Garo ruh kumjuh.
Ka Congress mynta ka don tang uwei MLA u Bah Ronnie V Lyngdoh, bad uwei MP sha Ïingdorbar Lok Sabha u Saleng A Sangma, hadien ba lai ngut ki MLA ka Congress ki la phet noh sha ka NPP.
