Shillong, Naiwieng 10
Ka North East Students’ Organisation (NESO) kan sa phah jingthoh sha ka tnad pule-puthi ka Sorkar Pdeng ban shimkhia halor ki kynrum-kynram kiba dang bteng mynta ha North Eastern Hill University (NEHU).
“Na ka liang ka NESO, ngi wan ban kyrshan ïa ka jingïakhih ka NEHUSU bad ka KSU-NEHU Unit halor ki jingdawa bapher-bapher kiba ki la dawa mynta la bun-bun bnai,” ong u Chairman ka NESO, Bah Samuel B. Jyrwa haba kren sha ki lad pathai khubor hadien ka jingïakynduh bad ki samla kiba dang pynlong ïa ka jingïakhih shah thngan ba khlem buh por ha katei ka skulbah ha ka Sngi Saitjaiñ.
Haba kdew ba u Vice-Chancellor (VC), Prof. Prabha Shankar Shukla naduh ki por mynshuwa um shym la treh ban sngap ïa ki samla pule (haduhba mih sa ka jingdawa hiar shuki ïa u), u Bah Jyrwa u la ong ba ka seng ka ai ka jingkyrshan ïa ka jingïakhih ki samla pule naba kane kam dei ka jingïohnong shimet jong ki samla pule hynrei jong ka skulbah baroh kawei.
“Ngin thoh sha ka tnad pule-puthi ka Sorkar Pdeng halor kine ki kynrum-kynram kiba la jia mynta la bun-bun bnai bad ba ka tnad ka dei ban shimkhia halor kane ka kam kumjuh ban shim ki sienjam ban pynbeit ïa ki kynrum-kynram kiba jia ha ka skulbah,” ong u Chairman da kaba bynrap ba ïa ka jingthoh, yn sa phah ha ka Lah Sngi U Blei mynstep lyngba ka ’email’.
Haba pynsngew ba kam pat ju poi haduh une u pud ba ki nongpynïaid ka skulbah kin pyneh, u la ong ba mynshuwa ki don ki jingïakhih ba malu-mala hynrei tang shu ïakren bad u VC, ki kam ki la beit.
U la ong ruh ba ha ki por jong ki VC mynshuwa, ka skulbah ka don beit ha ka kyrdan ‘Top-20’ hynrei naduh ba wan une ba mynta (Prof. Shukla), ka skulbah ka la poi shabar jong ka kyrdan 100.
Haba kylli, u Bah Jyrwa u la ong, “Kane ka thew shata hi naba u VC naduh kaba nyngkong u pyneh bad ngi la ïohi na ka liang ki nonghikai bad ki nongtrei ki bym dei ki nonghikai ki la pynpaw ïa ki jingeh haba ïadei bad une u VC. Kine kiei-kiei hi ki mih na ka daw ka jingsngew hangamei, jingsngewheh bad ka jingbym nang ban pynïaid kam jong une u VC hapoh skulbah.”
Shuh shuh haba pynpaw ba wat la ka NEHU ka dei ka skulbah ka Sorkar Pdeng, utei u nongïalam u la bynrap, “Hynrei ka don hapoh Jylla jong ngi, Nga sngew ba ka Sorkar Jylla ruh ka dei ban shimkhia, ban pynbeit bad tuklar ïa ki jingeh hapoh NEHU namar ki jingeh ha NEHU ki ktah nyngkong eh ïa ki samla pule ka Jylla bad kiwei pat kiba wan pule na kiwei-kiwei ki Jylla.”
