Nongpoh, Naiwieng 11
Ki ‘riew rangbah na ka shnong Lumsohpieng bad Lumdaitkhka jong ka thaiñ Umroi kiba don ïa ka mynsiem jong ka jingsngewkhia jur halor ka jingpom dieng be-aiñ pathar jong katto-katne ki briew ki bym lah satia ban tip ha ka khlaw Bhoirymbong Pyllun kaba la long trai da ka shnong Lumsohpieng bad Lumdaitkhka, ha ka Lah Sngi U Blei ki la mih shakhmat ban pynlong ïa ka jingleit jurip ryngkat bad ki bor jong tnat Khlaw na ka bynta ba kin shimkhia ban pynlong ïa ka jingtohkit bad kem ïa ki briew kiba donkti.
U Bah Aiborlang Jyrwa haba kren sha ki lad pathai khubor, u la ong ba kum ki nongshong shnong kiba don ïa ka mynsiem kaba sngewkhia jur halor katei ka jingleh dusmon bad pynjulor ïa ka mariang da kaba pom pathar ïa ki dieng ha katei ka khlaw khlem ka jingïoh jingbit, ka wanrah ïa ka jingjulor ym tang ïa ki tyllong um bad ka mariang sawdong sawkun, hynrei kan ktah ruh wat ïa ka koit ka khiah jong ki paidbah nongshong shnong.
Une u rangbah, u la pyntip ruh ba ïa kane ka jingpom dieng be-aiñ hapoh katei ka khlaw tang mar hadien ka jingïoh jingtip bad jingujor, na ka liang ka jong u lem bad kiwei de ki ‘riew rangbah, ki la leit ban ai da ka jingujor sha ki nongïalam shnong Lumdaitkhka bad Lumsohpieng bad wat sha ka ophis jong u Deputy Commissioner ka Ri Bhoi ruh na ka bynta ba kin leh eiei ban khang shisyndon ïa kum kine ki kam be-aiñ bad na ka liang ka jong ki ruh kin dang ïai buddien halor kane ka kam.
Halor kane ka bynta, u Bah Aiborlang Jyrwa u la buh ruh ka jingkyrpad sha ki nongïalam shnong ba kin ai ïa ka jingïatreilang na ka bynta ka bha ka miat bad ka jingmyntoi jong ki paidbah nongshong shnong.
