Shillong, Naiwieng 11
U Nongïalam ka Bharatiya Janata Party (BJP) uba dei u Myntri ha ka Sorkar Jylla, Bah Alexander Laloo Hek u la pynpaw ba na ka bynta ban pynbeit ïa ka kynrum-kynram ha North Eastern Hill University (NEHU), la dei ban kylliang noh ïa u Vice Chancellor lada ka long, hynrei u la bynrap pat ba kane ka shong ha ka jingbishar jong ka Sorkar Pdeng na Delhi.
U la ïathuh ba ha ka taïew ba la dep u la phah da ka shithi sha ka shlem treikam u Myntri ka tnat Pule-Puthi ka Sorkar Pdeng halor ka kynrum-kynram hapoh ka skulbah NEHU, bad pyntip ruh ba man la ka sngi u ïakren bad ki nongïalam ka BJP ha Delhi halor ka jinglong-jingman hapoh ka skulbah kaba don ha kane ka Jylla.
“Nga khlem ïakren sha Delhi ban bujli noh lane pynneh ïa u Vice Chancellor, hynrei ha ka jingsngewthuh ka jong nga, ïa mynta hi la dei ban kylliang noh ïa u Vice Chancellor lada ka long, kata ka shong ruh katkum ka jingbishar na ka Sorkar Pdeng”, la ong u Bah Hek.
Ka jingïakhih hapoh ka skulbah NEHU da ki samla pule ka la ïaid mynta hynñiew sngi, hadien ba u Vice Chancellor u la mynthi ban sngap ïa ki jingdawa. Kumta na ka liang ki samla pule hapoh ka jingïalam ka NEHU Students’ Union bad ka KSU NEHU Unit ki la pynlong da ka jingshah jingit ba khlem buh por ban dawa ïa u VC ba un hiar shuki.
U Bah Hek u la ïathuh ba ka jingïakren bad ki heh ka seng BJP sha Delhi ka la ïaid bha shakhmat, bad katkum ka jingpyntip ba u la ïoh na Delhi, ki nongïalam ka BJP ki la shim khia ïa kane ka kam.
“Ka Sorkar na Delhi ka la dei ban pyrkhat na ka bynta jong baroh ki liang, na ka bynta ka jingbha jong ka Jylla Meghalaya bad kumjuh na ka bynta jong ki Jylla kiba don ha kane ka thaiñ Shatei Lam Mihngi, namar kane ka skulbah ka dei jong kane ka thaiñ baroh kawei”, u la ong.
