Shillong, Naiwieng 11
Hadien hynñiew sngi ka jingshong shah thngan jong ki khynnah pule ka North-Eastern Hill University (NEHU) kiba don hapoh ka shatri jong ka North-Eastern Hill University Students’ Union (NEHUSU) ha ryngkat ka jingïatreilang bad ka KSU NEHU Unit kaba la sdang naduh ka 5 tarik u Naiwieng 2024, la sakhi ba ki nongkitkam bad ki dkhot ka NEHUSU bad ka KSU NEHU Unit ki la kem pang namar ka jingshong shah thngan kaba khlem buh por hapoh ka phyllaw jong katei ka Skulbah.
Kumta ha ka janmiet jong ka Lah Sngi U Blei ka 11 tarik u Naiwieng 2024, ka samla ïa kaba la tip kyrteng kum ka Cecilia Pyngrope kaba bat kum ka Vice-President jong ka KSU NEHU Unit, ka la shah pynkit noh sha Civil Hospital, Shillong namar ka jingban eh ka jingtlot ha ka met-ka phad jong ka.
Na ka liang kane ka samla ka la rai ba ynda ka la koit- khiah kan bteng biang ïa ka jingshong shah thngan tat haduh ba u Vice-Chancellor ka NEHU un pynurlong ïa ki jingdawa jong ki samla pule ka Skulbah.
Kum ban shu kdew hangne, na ka liang ki samla pule ka skulbah NEHU ki la pynlong da ka jingïakhih shong shah thngan kaba khlem buh por hapoh ka phyllaw jong ka skulbah naduh ka 5 tarik u Naiwieng 2024 ban dawa hiar shuki mardor ïa u Vice-Chancellor (VC) ka skulbah, u Prof. Prabha Shankar Shukla hadien ka jingdonkti jong u ban thung kam be-aiñ ïa u Registrar, Deputy Registrar bad kiwei ki ophisar. La dawa ruh ba u dei ban weng kam mardor ïa ki nalor ka jingmih ki jingkynnoh pyrshah ïa u ba u dei u VC uba isih ïa ki trai ri-trai muluk bad kumjuh halor ka jingbym treh thung kam ïa ki Pro Vice-Chancellor ha Shillong bad Tura NEHU Campus da ki trai ri-trai muluk nalor kiwei-kiwei.
