Shillong, Naiwieng 11
Ki nongñiah kali kamai kiba ju ïeng man la ka por ha ka thaiñ Motphran ban pynhiar bad kyntiew ïa ki paidbah nongshong kali kamai ban leit buh sha ki thaiñ Civil Hospital, IGP ter-ter shaduh Polo, ki la pynpaw ïa ka jingeh bad ka jingpyrshah kaba jur hadien ka jingbym ïoh shuh jong kitei ki nongñiah kali kamai ban ïeng na katei ka jaka.
Kitei ki nongñiah taksi kamai ki la ïathuh ba kane jingshah khanglad ban pynïeng kali ha Motphran ka la sdang naduh ka 4 tarik u Naiwieng 2024, ha kaba ki la don kiwei ki kynhun kali kamai kiba la kynnoh ba kane ka la wanrah ïa ka jingdheng kali kaba jur bha ha kitei ki bynta.
Haba ïoh ban ïakren bad uwei u nongñiah taksi kamai uba ju ïeng kamai kali ha Motphran, u la ïathuh ba ïa kane ka jaka la pynïoh da ka Synjuk ki Nongñiah Taksi Sor bad Khapsor. Man la ka por ki nongkamai kali na Motphran ter-ter sha Polo, ki ju ïoh ban ïeng ha Motphran kumba ar tylli eiei ki kali kamai hynrei kynsan-kynsan pat ka la mih kawei ka kynhun kaba la khanglad ïa katei ka kynhun ki nongkamai na Motphran sha Polo ban ïeng ha katei ka jaka kaba don ha Motphran.
“Ngim kwah ba kano-kano ka seng kan wan mushlia ïa ka kam kamai bad ka jakpoh jong ngi namar kane kam long kaba shong hok”, ong utei u nongkamai kali.
U la ong ba kane ka jingkhanglad ïa ki nongkamai kiba kamai sha ki thaiñ Civil ter ter sha Polo ban ïeng ha katei ka jaka ha Motphran ka la wanrah ka jingktah kaba jur bha ym tang ïa ki nongñiah kali kamai hynrei wat ïa ki paidbah nongshong kali kumjuh.
Kumta na ka liang jong u lem bad ki para nongñiah kali kamai kiba ju kamai na Motphran ter-ter sha Civil Hospital bad Polo ki la kyrpad jur ïa ki pulit pynïaid kali ba kin ailad ïa kitei ki nongkamai ba kin ïeng tang ar tylli ruh ki kali ha katei ka jaka.
Ha ka jingïakren pat bad u Bah Pynsuk Youroi, General Secretary ka Synjuk Ki Nongñiah Taksi Sor bad Khapsor, u la ong ba la ar snem mynta ki la ïoh ban pynïeng ar tylli ki kali ha katei ka jaka, hynrei ha ka jingpyntreikam thymmai kynsan ïa ka rukom pynïeng kali, la weng noh ïa katei ka jaka pynïeng kali ha Motphran.
U la ong ba kane ka jingshah weng jong kane ka jaka pynïeng kali ha Motphran ka la ktah shikatdei eh ïa ka kamai jakpoh jong ki para nongkamai kali ha kane ka jaka bad ong ba kane ka jingkhanglad ka la wan na ki bor pulit.
“Lada u Incharge ka Lumdiengjri um lah ban ai ïa ngi ïa ka jubab ha ka por kaba biang, ngim banse na ka liang jong ngi ban ïaid shakhmat da ka jingïakhih”, ong u Bah Youroi.
