Mawkyrwat, Naiwieng 12
Ka Dorbar Shnong Mawkhyrwang kaba hap ha ka dong Ri War, South West Khasi Hills District ha ka Sngi Ba-ar ka 12 tarik u Naiwieng, 2024 ka la pynlong ïa ka dorbar paidbah ha Umjapung hadien ba ki ar ngut ki samla jong ka shnong ki la shah shoh shah dat ha ki 3 ngut ki briew kiba la ithuh dur khmat kiba dei na ka shnong Mawrap bad Mawsain kiba tip kyrteng kum u Rismanwell Mylliem, u Shemphanglin Thongni bad u Mysticalman Thongni bad katba ki samla kiba shah shoh la tip kyrteng kum u Khmihthuh Syiemlieh bad u Apstarman Shylla.
Katkum ka jingïathuh jong kitei ar ngut ki lanot, ki la ong ba shwa ba kin shah ktah kti ha kitei ki briew la ong ba ka la don shwa ka jingïakajia hapdeng jong kitei 3 ngut bad kiwei ki briew kiba dei bad ki nongñiah kali.
Ki la ïathuh ruh ba ha ka por ba ki dang mut leit peit ïa kata ka jingkulmar, kyndit-kynsan kitei ki briew khlem da kren ki la shoh bad kura ïa kitei ar ngut haduh ba kim tip briew bad ki la ïathuh ruh ba donbok ha katei ka por ki donlang ki nongñiah kali kiba ïarap hynrei kim tip shuh kaei kaba jia ïa ki.
Ki la ïathuh ruh ba katei ka jingjia ka la jia ha ka janmiet jong ka 8 tarik u Naiwieng, 2024.
Kumta halor katei ka jingjia, ka shnong Mawkhyrwang ka la pynpaw ïa ka jingbitar halor ka jingshah shoh ki samla shnong da kaba kynnoh ruh ba kitei ki briew ki dei kiba ju pyndik ïa ka ïaid ka ïeng u paidbah man ka por.
Na ka liang ka shnong ha kane ka sngi ka la shim ruh ïa ka rai ban leit ujor da ka ejahar thanat Mawkyrwat pyrshah ïa kitei ki briew.
