Nongstoiñ, Naiwieng 12
Uwei u briew ïa uba la tip kyrteng kum u Bokstar Sohlang ba la 50 snem ka rta na ka shnong Mawkhlam-Nongpyndeng kaba hap ha West Khasi Hills District u la shah pynïap dusmon da kaba shah ot na u pdot.
Katkum ka tyllong khubor kaba la ïoh na ki heh pulit jong ka district, la ïathuh ba katei ka jingjia ka la jia hapoh ka shnong Rimiar jong ka thaiñ Maweit ha West Khasi Hills.
Shuh shuh ka khubor na ki heh pulit ka ong ruh ba katei ka jingjia ka la jia ha ka shiteng synñia jong ka 12 tarik u Naiwieng ha ka por kumba 1 baje eiei. La suba jur ruh ba utei u rangbah u la shah pynïap ha uwei briew ïa uba la tip kyrteng kum u Piswel Langrin hadien ka jingïakajia bad ka jingïania kaba la jia hajan ka ïing sah jong une briew.
Ka khubor ka la ong ruh ba hadien katei ka jingjia, utei u Piswel Langrin u la phet noh na katei ka jaka hynrei hadien katto-katne por da ka jingïarap ki paidbah nongshong shnong, ki pulit ki la ïoh ban kem noh ïa utei u suba donkti ban pynïap.
Shuh shuh la ong ba ïa ka daw haduh mynta ym shym la pat tip hynrei na ka liang ki pulit ki dang pynlong ïa ka jingtohkit kaba bniah.
