Tura, Naiwieng 12
Ka kynhun ‘Flying Squad’ jong ka Election Commission ka la ïoh ban kurup ïa ka pisa kaba long T.58 hajar na kawei ka kali Bolero ba la kynnoh ba la pyndonkam da ki briew ka All India Trinamool Congress, ha ka por ba la pynlong ïa ka jingtalasi kali ha ka thaiñ Kherapara shisngi shwa jong ka jingthep ‘vote’ hapoh ka Gambegre Konstitwensi.
Ki briew ka ilekshon ki la pyntip ba ka kynhun jong ki Flying Squad kiba don ka jingpahara ha ki surok ha ka thaiñ Kherapara-Rimrangpara, ki la pynïeng ïa kawei ka kali Bolero kaba dang don ha lynti ban leit sha Gambegre ha ka por kumba 8 baje eiei mynmiet.
Na kane ka kali, la ong ba kine ki briew ka Election Commission ki la lap katto-katne ka song pisa kaba dei da ki lut 500 bad kiwei ki lut khutia kaba la kot sha ka sanphew phra hajar tyngka. Lai ngut ki briew ha kane ka kali, ba la kynnoh ba ki dei ki nongtrei jong ka Trinamool Congress ki la shah bat noh na ka bynta ban kylli jingkylli.
“Kane ka kali ka dei kaba dang leit sha ki bynta jong ka thaiñ Rimrangpara jong ka Gambegre bad ki briew kiba shong ha kane ka kali, kim shym la lah ban ai ka jubab kaba biang ne jingtip halor ka pisa. Kumta ka kynhun jong ngi, ka la kurup noh ïa ka pisa,” la pyntip ki briew ka tnat Ilekshon.
Ka tyllong khubor na ki pulit ka la pyntip ba haduh mynta ki dang peit bniah ïa ka pisa haduh katno ka don bad ruh ban tip ïa ka kyrteng bad ka jingdon jingïadei jong kine ki 3 ngut ki briew.
Kum ban shu kdew, ka Trinamool Congress ka la pynïeng da ka MDC ba mynta ka GHADC, ka Sadhiarani M Sangma, kaba dei ruh ka kurim jong u Myntri barim u Zenith Sangma ban ïakhun na Gambegre Konstitwensi.
