Nongpoh, Naiwieng 12
Ha kawei ka jingïatyngkhuh kali kaba ishyrkhei ha ka step Sngi Ba-ar hapdeng ar tylli ki trok, uwei u nongñiah jong ka trok kit maw ‘clinker’ kaba dang hiar sha ka thaiñ Guwahati, u la mynsaw jur hadien ba ka trok kaba u ñiah, ka la leit ban tynrah nadien jong kawei pat ka trok kit mar kaba la don jingthut bad pynsangeh harud surok bah National Highway 6 ha 12 Mer.
Katkum ka khubor kaba la ïoh lum, la ïathuh ba katei ka jingjia ka la jia ha ka por kumba 4:30 mynstep katba katei ka trok kit maw ‘clinker’ kaba la ñiah da u Bah Hanpaia Laloo na ka shnong Rakabah ha West Jaiñtia Hills, kaba don ïa u registration number ML11-A-1436, ka leit ban tynrah ïa kawei ka trok kaba don ïa u registration number NL01-AD-5135 kaba la ñiah da u Bah Neverson Shadap kat haduh ba ki bynta ba shakhmat jong katei ka trok (kit maw clinker) ka la pra hi phom bad u Bah Hanpaia Laloo ruh u la sahkut syndon hapoh ka kali.
La ïathuh ruh ba ha kane ka jingjia, u Bah Hanpaia Laloo uba la sahkut hapoh ka ‘cabin’ jong ka trok, u la mynsaw jur na ka jingkdiah jong ki kjat bad ba la lah ban sei noh ïa u napoh katei ka ‘cabin’ hadien ar kynta tam lyngba ka jingwan ïarap jong ki kali khwai.
Kumta na ka liang ki pulit ki la pynkit noh mar-mar da ka kali kit nongpang ïa u Bah Hanpaia Lalo, uba dei na ka shnong Rakabah, West Jaiñtia Hills, sha Guwahati Medical College & Hospital (GMCH) na ka bynta ban pynïoh ïa ka jingsumar bad kumjuh ïa kitei ar tylli ki trok la weng noh na katei ka jaka ïatyngkhuh kali na ka bynta ban pynlong shuh shuh ïa ka jingtohkit.
