Shillong, Naiwieng 12
Ka jingthep ‘vote’ na ka bynta ka ilekshon shiteng samoi ha Gambegre konstitwensi kan long ha ka Sngi Balang ha kaba palat 33 ngut ki nongthep ‘vote’ kin rai ïano napdeng ki 6 ngut kyrtong ban mihkhmat sha ka Ïingdorbar Thawaiñ ka Jylla na kane ka konstitwensi.
Ka jingthep ‘vote’ kan sdang ha ka por 7 baje mynstep haduh 4 baje janmiet hapdeng ka jingpahara ki pulit ka jylla bad CAPF ha baroh 51 tylli ki jaka thep ‘vote’.
Ha kane ka ilekshon shiteng samoi, ka jingïakhun ka long kaba jwat bad ka dei ruh ka jingïakhun na ka bynta ka burom khamtam eh ïa ka NPP bad ka Congress.
Ka Congress ka dei ban jop khnang ban bat biang ïa ka Gambegre konstitwensi kaba la ju mihkhmat da u MLA ka Congress u Saleng A Sangma uba la long mynta u MP ka Tura, katba ka NPP ka hap ban jop ïa kane ka ilekshon kum ka seng kaba don ha ka bor synshar, khamtam haba ka pynïakhun da ka kurim jong u Myntri Rangbah ka Dr. Chandee A Sangma kum ka kyrtong.
Ka Congress kan pynïakhun da u Jingjang M Marak kum u kyrtong bad ka TMC kan pynïakhun da ka Sadhiarani Sangma kaba dei ka kyrtong jong ka All India Trinamool Congress (AITC) bad kaba dei ruh ka hep kynsi jong u Dr Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla. Kiwei pat ki kyrtong ki long u Bernard N Marak u kyrtong ka BJP uba dei ruh u MDC, nalor ar ngut ki kyrtong shimet u Sengkrabirth M Marak bad u Jerry A Sangma.
Baroh ki nongpynïaid ïa ka ilekshon ki la mih na Tura ha ka Sngi Ba-ar bad ki la poi sha la ki jong ki jaka thep ‘vote’ na ka bynta ban pynïaid ïa ka jingthep ‘vote’ ha ryngkat ka jingsynran lang ki pulit pahara.
Ka Gambegre konstitwensi ka don 33,088 ngut ki nongthep vote kiba kynthup 16,881 ngut ki shynrang bad 16,207 ngut ki kynthei.
