Shillong, Naiwieng 12
Ka Sorkar Pdeng lyngba ka tnat Panchayati Raj ka la pyllait teng ïa ka pisa kumba T.27 klur na ka bynta ki lai tylli ki Autonomous District Council (ADC) ha Meghalaya. Kane ka dei ka jingpyllait pisa kaba nyngkong (1st installment) kaba dei ka Untied Grants na ka bynta u snem 2021-2022 hapoh ka 15th Finance Commission.
Ki lai tylli ki ADC ki kynthup ïa ka Khasi Hills Autonomous District Council, Jaiñtia Hills Autonomous District Council (JHADC) bad Garo Hills Autonomous District Council (GHADC).
Kane ka dei ka sien kaba nyngkong ba ka Sorkar Pdeng kan pyllait ïa ka pisa sha ki lai tylli ki ADC hadien bun snem ba la pynsahteng khlem pyllait ïa ka pisa kaba dei ban ai bhah ïa ki district council ha kane ka Jylla.
Ka Untied Grants bad Tied Grants ki dei kiba la mang da ka Sorkar Pdeng na ka bynta ki shnat treikam kiba la thaw katkum ki kyndon ka Riti Synshar jong ka ri bad haduh mynta la pynïaid lyngba ka tnat Panchayati Raj ha kaba ka Sorkar Pdeng ka pyllait ïa ka bhah sha ki shnat treikam katkum ka Riti Synshar hapoh ka 15th Finance Commission.
Ka Sorkar Pdeng lyngba ka tnat Panchayati Raj bad ka tnat Jal Shakti (Department of Drinking Water and Sanitation) ki ju pyllait pisa katkum ka 15th FC sha ki jylla bapher bapher kiba don ïa ki shnat treikam katkum ka Riti Synshar jong ka ri man la u snem mang tyngka.
