Tura, Naiwieng 12
Shisngi shuwa ban sdang ka ilekshon shiteng samoi ha Gambegre, ka la don ka ejahar kaba la ujor pyrshah ïa u MDC ka NPP na Boldamgre, u Stevie Marak, halor ka jingkynnoh ktah kti, pyntieng da ka tiar siat bad ka jingpynkheiñ ïa ki kyndon ka Election Commission, kaba la ïathuh ba la jia ha ka por mynstep jong ka 12 tarik Naiwieng.
Ïa kane ka ejahar la ujor ha u ophisar ba dei peit ïa ka thanat Damalgre da u Jostview D. Sangma ha kane kajuh ka sngi.
Katkum ka ejahar, katei ka jingjia ka la jia ha ka por 1 baje shiteng synñia ha kaba u Sangma, uba don bynta bad ka kynhun kaba dang pynlong ïa ka jingpeitngor ïa ka imlang-sahlang, ban khang ïa ka jingai pisa sha ki nongthep ‘vote’, u la shah thombor, shah byrngem, kumjuh ki trai shnong na katei ka thaiñ kiba la shah pyntieng ha u MDC.
U Sangma, ha ka ejahar, u la kdew ba la khang tyngeh ïa ki kyrtong, ki ‘agent’ ilekshon bad ki nongtrei ka seng ban pynlong ïa kino-kino ki jingïalang paidbah ne ban ïashim bynta ha ki jingïalap ilekshon na kawei ka thliew ïing sha kawei pat ha ka por ba treikam ka kynta jar-jar, da kaba bynrap ba u MDC um shym la donkti tang ha ka ban thombor hynrei u la pynkheiñ ruh ïa ki kyndon jong ka Election Commission.
“Shuh shuh, katkum ka ‘Arms Act’, baroh kiba bat ïa ki suloi ba don laisen kin hap ban buh ïa ki tiar jong ki ha ka thanat kaba jan tam ha shuwa ka ilekshon ban ïada na ka jingpyndonkam bakla. Da kaba bat bad pynpaw pyrthei ïa ka suloi jong u ha kane ka por, ym tang ba u pynkheiñ ïa ki aiñ jong ka EC hynrei u pynkheiñ ruh ïa ki kyndon jong ka Arms Act,” bynrap biang u Sangma.
Na ka liang u Sangma, ha ka ejahar u la dawa ba dei ban pynrung noh ïa ka jingujor jong u kumjuh ban pyndam noh mardor ïa ka laisen (arms license) jong u MDC kumjuh ban leh eiei katkum ka aiñ pyrshah ïa u.
Na ka liang u DC West Garo Hills, ha ka kyrwoh ha ka rynsan lad pathai u lah ong haba ïadei bad kiba bun ki jingkynnoh pynkheiñ ïa ka Model Code of Conduct da ki nongmihkhmat, la ïaid shakhmat bad ka jingtohkit majistor haba ïadei bad kane ka bynta.
Ha kajuh ka por, yn sa leh ïa kaba donkam katkum ka aiñ lyngba ki kyndon ka ECI pyrshah ïa kine ki jingpynkheiñ.
