Shillong, Naiwieng 12
Ha ka 7 tarik mynta u Naiwieng ki pulit ka Jhalupara Outpost ki la leit ban shimti ïa ki shyieng briew na kawei ka khlaw Sorkar kaba don ha Upper Shillong, marjan bad ka shnong Mawklot bad na ka liang ki pulit ki la pynlong ïa ka jingtohkit halor katei ka jingïoh ïa ki shyieng briew na katei ka khlaw.
Na ka liang uwei u heh pulit ka Shillong u la ïathuh ba na katei ka jaka la lap ruh ïa ki jaiñ phong jong u rangbah briew, ha kaba u la ïathuh ruh ba ha ka jingtohkit ba la leh haduh mynta la suba ba katei ka met ka dei jong uwei u nonghikai skul uba na ka shnong Upper Mawprem, Shillong, hynrei ïa kane ym pat lah ban pynthikna namar haduh mynta ki pulit kim pat ïoh ïa ka kaiphot ba la phah eksamin ïa ka DNA.
Une u heh pulit u la pyntip ruh ba katkum ka jingtohkit la suba ba ki shyieng ba la ïoh na katei ka khlaw ba la sop hapoh jong ki jaiñ phong ki lah ban dei jong u Sanjay Sharma (55 snem) uba dei u nonghikai skul, bad uba la jah naduh ka 15 tarik u bnai Ïaïong mynta u snem.
Haba kylli, na ka liang une u heh pulit u la ong ba ym lah ban kyntait ba katei ka jingjia ka dei ka jingrahbor bad pynïap, bad ym lah ruh ban kyntait ba ka lah ban dei ka kam lute, hynrei ïa kine baroh ki pulit ki dang pynlong ka jingtohkit ban lap ïa ki jingshisha baroh.
U Sanjay Sharma u dei u nonghikai kawei ka skul ha ka shnong Hawang, West Karbi Anglong, Assam. Katkum ka jingujor ki bahaïing sha ki pulit, u Sanjay u la poi sha Shillong ha ka 15 tarik u Ïaïong ha ka por mynstep ban leit thied tiar na Ïewduh, pynban naduh katei ka por u la jah syndon khlem ïoh shuh haba pyrshang ban ‘phone’ ruh.
Ha ka jingtohkit ki pulit bad na ka jingkhmih ïa ki kor ringdur CCTV ha ki katto-katne ki thaiñ la ïohi khatduh ïa u Sanjay ha ka thaiñ Lumdiengjri marjan bad ka jaka ïeng kali Ri-bhoi.
