Shillong, Naiwieng 12
Ka North East Students’ Organisation (NESO) ha ka Sngi Ba-ar jong ka 12 tarik u Naiwieng 2024, ka la kyntu ïa u Myntri ka tnat Pule-Puthi jong ka Sorkar Pdeng, u Dharmendra Pradhan ban tuklar lem halor ka jingeh kaba la mih hapoh ka Skulbah North Eastern Hill University (NEHU) bad ban beh kam noh shisyndon ïa u Vice-Chancellor katei ka Skulbah, u Prof. Prabha Shankar Shukla kumba la dawa da ki samla pule na ka bynta ban ïada ïa ka bha- ka miat baroh jong ki samla pule ka thaiñ Shatei Lam-Mihngi ka Ri.
Kum ban shu kdew hangne, ki samla pule jong ka North Eastern Hill University (NEHU) ki la pynlong ïa ka jingshah thngan kaba khlem buh por naduh ka 5 tarik u Naiwieng 2024 hakhmat ka khyrdop jong ka kamra treikam u Vice-Chancellor ban dawa weng kam noh ïa u Vice-Chancellor jong ka Skulbah, u Prof. Prabha Shankar Shukla lem bad katto-katne ngut ki ophisar ka Skulbah namar ka jingkynnoh ba ki la shah thung kam be-aiñ nalor kiwei-kiwei ki jingleh bym hok.
Ha ka shithi ba la phah sha u Myntri ka tnad Pule-Puthi jong ka Sorkar Pdeng, u Dharmendra Pradhan, na ka liang u Chairperson ka NESO, Bah Samuel Jyrwa bad u General Secretary, u Mutsikhoyo Yhobu ki la ong ba ka jingshah thngan ba khlem buh por jong ki samla pule naduh ka 5 tarik u Naiwieng 2024 ka la wanrah ïa ka jingthut ha kiba bun ki bynta ha ka rukom pynïaid ha kane ka skulbah.
“U Prabha Shankar Shukla u long u bym pynsngap ïa ki jingeh bad ki jingkyrpad jong ki samla pule, ki nonghikai, bad ki bym dei ki nonghikai naduh ba u la shimti ïa ka kam kum u VC jong katei ka Skulbah. Ki dorkhas hadien ki dorkhas la ai sha u VC da ka NEHUSU hynrei u VC u kham duna ka jingsngewkhia ha ka ban weng ïa ki jingeh kiba pynjynjar ïa ka skulbah,” ong ka NESO.
Ka NESO ka la ong ba katei ka jingïakhih ka la wanrah ïa ka jingthut ha ki klas namar ka jingbym ïatreilang jong ki khynnah skul, ki nonghikai, bad ki nongtrei bym dei ki nonghikai, katba ka koit ka khiah jong ki khynnah pule kiba shah jingit ka la nang sniew na ka sngi sha ka sngi.
“Ka jinghiar ha ka kyrdan jong ka Skulbah ka dei ka jingpynpaw kaba shai bha ïa ka jingbym lah jong ka bor synshar ban pyndep ïa ki kamram ba kongsan jong ka,” ong ka NESO bad bynrap ba ka NEHU ka don hapdeng ki 60 tylli ki skulbah ba pawnam ha India shwa ba yn thung ïa u Prof. Shukla kumba lai snem mynshwa.
“Hapoh ka jingïalam jong u, ka kyrdan jong ka skulbah ka la hiar stet sha ka kyrdan kaba hapdeng 100 bad 150, ka jinghiar kaba jur bha tang hapoh lai snem. Kane ka jinghiar ha ka jingtreikam ka dei ka daw kaba kyrkieh ban sngewkhia bad ka jingdonkam ban pynbeit mardor”, la ong ka NESO.
Shuh-shuh ka seng ka la jer ïa katto-katne ki mat ki bym pat lah ban pynbeit ha ka por ba u Prof. Shukla u dang synshar, kynthup ïa ki jingtei kiba sniew, ka jingduna bor briew kaba jur, ki jingpynrung kam ki bym pat pyndep, ka jingpynthut ïa ki rukom pule puthi, ka jingthung kam khlem akor ïa ki briew kiba bym jong ïa ka jingtbit, bad ka jinglong nongïalam bym don ha ka kam
“Ka NESO ka kyrshan jur ïa ka jingdawa jong ka seng ki samla pule jong ka NEHU ban pynkut noh ïa ïa por treikam jong u Prof. Shukla kum u Vice-Chancellor, u Col(Retd), u Omkar Singh kum u Registrar bad u Amit Gupta kum Deputy Registrar (Academics) bad kiwei-kiwei pat ki nongtrei ki bym don jingtbit ha ka kam ha kaba ki kam jong ki, ki la ïalam beit sha ka jingsniew jong ka skulbah,” bynrap u Bah Samuel Jyrwa.
