Shillong, Naiwieng 13
Ha ka synshar paidbah, baroh ki don ka hok ban pynpaw la ka long da ki jingïakhih lane da kiwei ki lad kiba long katkum ka Article 19 jong ka Riti Synshar ka Ri India. Hynrei kane kam mut pat ba ka jingïakhih jongno-re-jongno kan ktah bad pynthut ïa ka ïaid ka ïeng ki paidbah.
Hynne ka Sngi Balang ki dkhot ka JAC kiba don kumba hapoh 100 ngut ei-ei ki la leit tur sha ka shlem treikam jong ka Khasi Hills Autonomous District Council (KHADC) ban pynpaw ïa ka jingpyrshah halor ka rai ban pynkynriah ïa ki 3 tylli ki polling station na Mawshynrut sha Rambrai-Jyrngam konstitwensi, hynrei namar ka jingbym ïohlad ban rung sha phyllaw ka Council, ki la shong syndon hapdeng surokbah kaba la wanrah ïa ka jingdheng kali kaba jur ha ka thaiñ baroh kawei.
Ka jingtur jong kitei ki nongïakhih sha KHADC ka la sdang naduh ka por mynstep, hynrei ha ka por kumba 12:30 ei-ei mynsngi ki la sdang ban shong syndon hapdeng surok hakhmat ka KHADC, bad kane ka jingleh ka la neh haduh kumba lai kynta, kaba la wanrah ïa ka jingsahkut ka leit ka wan na ka jingdheng kali.
Namar kane ka jingleh palat jong ki nongïakhih la sakhi ba ki nongleit nongwan ki hap ban ïa pyni-nia bad ki nongïakhih tang ban lait ki ar shaka. Ki katto katne ngut ki longkpa kiba wan shaw skul ïa la ki khun ki hap ban ïa pyni-nia bad ki nongïakhih ban ïoh ïaid na katei ka surok, katba kiwei pat ki hap ap palat lai kynta.
La sakhi ruh ba wat ki kali kit nongpang (Ambulance) ki la shem jingeh ban ïoh ïaid lyngba katei ka surok bad dei hadien ka jingtuklar ki pulit, ki katto katne ki ar shaka bad ki kali kit nongpang ki la ïoh ban ïaid.
