Jowai, Naiwieng 13
Ki nongrep na ka shnong Wahïajer bad kiwei kiwei shnong na Jaiñtia Hills ki la pynpaw ka jingsngewsih ban ïohi lyngba ki lad pathai khubor ïa ki jingjia hapoh ka skulbah NEHU ha kine ki khyndiat sngi.
Ha ka kyrwoh ba la phah da ka Nongïalam ki nongrep na ka shnong Wahïajer ka Kong A Phawa, ka la ong “Ngi sngewthuh ïa ki jingeh kaba ki samla pule ka skulbah NEHU ki ïakynduh, ngi kyrmen skhem ruh ba ki jingkwah ki jong ki, kin wan urlong da ka jingsuk bad jingsngewthuh jingmut baroh arliang.
Ka Kong A Phawa ka la ong ba kum ki nongïoh jingïarap lyngba ki prokram ai jinghikai bapher-bapher kiba la pynlong da ka NEHU hapoh ka jingïalam u Vice-Chancellor, ryngkat bad ka jingïatreilang ka Principal, ki nongrep ki kwah ban pynpaw ba ki khun ki kti jong ki ryngkat bad ki shnong ki thaw, ki la ïoh jingmyntoi kaba khraw shibun lyngba ki jinghikai (training) bad jingïarap lyngba ka NEHU shaphang ki rukom rep bathymmai ba la hikai da ki Scientist ka pynsngewthuh ruh ha ki ïa ka jingkordor ban long ruh ka jingïarap ïa ka rukom im nangne shakhmat.”
“Lyngba ki prokram bapher-bapher, ngim ju shem ne ïohsngew ba u Vice-Chancellor u leh shiliang khmat ïa ngi ki rit paid riewlum. Kum ki nongïoh jingïarap, ngi sngewthuh ïa kiei ba ki samla pule ka skulbah NEHU ki ïaid lyngba, kumta ngi kyrpad rit ïa baroh bad khamtam ïa ki samla pule ban don kata ka jingsngewthuh jingmut na baroh arliang ban wan sha ka jingïasuk na ka bynta ka jingbha ka jylla”, la ong ka Kong A Phawa, Nongïalam ki nongrep.
