Shillong, Nailar 07
Ka Synjuk Ki Nongsynshar Shnong Ka Bri U Hynñiewtrep (SNSBH) ha ka Sngi Thohdieng ka la ïakynduh ïa u Myntri Rangbah ka Jylla, u Conrad K. Sangma bad u Symbud Myntri Rangbah ka Jylla ka tnad District Council Affairs (DCA), u Bah Prestone Tynsong ban kyrpad ïa ka jingtuklar jong ka Sorkar halor ka Khasi Hills Autonomous District (Regulation and Administration of Land) Amendment Bill, 2026 kumjuh ïa ka jingpynbna haba ïadei bad ka ‘Land Ceiling’.
Ha ka jingthoh ba la aiti sha u Myntri Rangbah ka Jylla, ka kynhun ka la pynpaw ïa ka jingsngewkhia ba ka ‘Amendment Bill’ ba la mynjur da ka KHADC ha ka Dorbar (jong ka) ha u bnai Jylliew, 2026 ka la weng noh ïa ka kyndon ba donkam – ba ka Executive Committee ka dei ban ïasyllok bad ki Dorbar Shnong, ki Dorbar Raid bad ki Dorbar Hima hashuwa ban pynbeit ïa ki bynta jong ka ‘Ceiling on Settlement’, ka jingai bynta ne ban buh la ka jong ïa ka jaka Raid hapoh ka ‘Section’ 16 jong ka ‘Principal Act’, 2021.
Ka Synjuk ka la ong ba kane ka jingwanrah jingkylla ka pyntlot ïa ka bynta jong ki shlem treikam tynrai kiba la shakri la bun pateng kum ki nongri-nongsumar ïa ka rukom synshar trai-ri bad ka jingpynïaid ïa ka khyndew ka shyiap katkum ka riti-dustur.
Haba kdew ïa ka jingïalang jong ki shlem treikam tynrai kaba la long ha Shillong ha ka 7 tarik u Naitung, 2026, ka kynhun ka la ong ba da kawei ka jingmut ka la rai ban pyrshah ïa kane ka ‘Bill’.
Ka Synjuk ka la kynthoh ba katei ka jingpynkylla ka long pyrshah ïa ka nongrim jong ka ‘Principal Act’ bad ka rukom bat khyndew (tynrai) jong ki Khasi; ka pyntlot ïa ka nongrim jong ka jingïatreilang ne ka ‘Cooperative Federalism’ bad ki jingpeitngor ïa ka synshar paidbah, bad la mynjur khlem da ïamir jingmut shuwa bad ki shlem treikam tynrai.
Ka kynhun ka la pynsngew ruh ïa ka hukum jong ka KHADC (No. DCRBF/13/465/2026/14/161 dated June 11, 2026), kaba buh ïa u pud halor ki jaka Raid. Ka la ong ba ïa katei ka hukum la pynmih khlem da bud ïa ka rukom treikam, kata ka jingïamir jingmut ba la buh ha ka ‘Section’ 16 bad ong ba katei ka jingpynbna “ka long ka bym ïahap” bad ka lah ban wanrah ïa ka jingkulmar-jingmut ha ka kyrdan ki shnong ki thaw.
Na ka liang u Myntri Rangbah ka Jylla, ha ka jubab jong u, u la pynpaw biang ïa ka jingkular jong ka Sorkar ban ïada ïa ki shlem treikam tynrai, ka synshar katkum ka riti-dustur, ka hok longtrai ïa ki jaka trai-ri trai-muluk bad ka pateng tynrai ai jait kmie ba kyrpang jong ka Meghalaya.
Ka kynhun ka la pdiang sngewbha ïa ka jingïakren bad pynpaw ïa ka jingsngewnguh halor ka kular jong u Myntri Rangbah ka Jylla.
