Shillong, Nailar 07
Ha ka miet jong ka 07 tarik u Nailar 2026, ki 4 ngut ki dkhot jong ka Hynñiewtrep National Youth Front (HNYF), ki la lait jamin noh hadien 7 sngi ba ki la shah kem ha ki pulit.
Kine ki 4 ngut ki dkhot ka HNYF, ki kynthup ïa u Bah Tyllibor Swer, Steve Khyriem, Kit Ryngkhlem bad u Jeft Sohtun.
Lah ban kdew ba ïa kine ki 4 ngut la shah kem ha ka miet jong ka 31 tarik u Naitung 2026, hadien ka jingsaphriang ka durkhih, ba ki la phah ïaid da ka kjat bad phah bat shkor ïa u nongïasaid aiñ, uba la shah kynnoh jrongkti ïa kawei ka samla pule law, kaba dang leh internship bad u.
Ha kane ka miet lait jamin, kine ki 4 ngut ki dkhot la wan ban synranlang da ki dkhot ka HNYF, lem bad ki bahaïing hasem.
Na ka liang ki nongïalam ka HNYF, ki la pynpaw ka jingsngewkmen hadien ba ki 4 ngut ki dkhot ki la lait jamin noh.
“Ka jingrung ki dkhot ka seng hapoh Jail, kadei ban ïada ïa ka ri bad ka jaidbynriew bad na ka bynta ki samla kynthei ka Jylla. Ngi ïohi ba mynta ka jingshah thombor, ki khyllung khynnah, ki longkmie bad ki samla, ka ju jia na ka por sha ka por,” ki la ong.
Kumta ki nongïalam ka HNYF, ki la ai ka jingïaroh na ka bynta ki dkhot ba la shah kem, da kaba kyntu, ba kin nangïai shakri met bad mynsiem.
“Hooid haba ngi shakri, ngi ju ïakynduh kiba bun ki jingeh bad ngi hap mih bad rung hapoh jail. Kine ba la shah kem wat ju duh mynsiem, namar phi leh ïa kaei kaba bha tam ban shakri ïa ka ri bad ka jaidbynriew,” ki la ong.
Shuh shuh ki la dawa na ka aiñ, ba kidei ban bishar hok halor kane ka bynta halor ka jingkynnoh donkti u nongïasaid aiñ ban jrongkti ïa ka samla pule law.
