Shillong, Nailar 07
U Myntri Rangbah ka Jylla u Conrad K Sangma ha ka 07 tarik u Nailar 2026 u la khot ïakren ïa ki nongïalam ka Joint Action Committee (JAC) Stone Crushers Owners ‘Association, Quarry Owners and Workers’ Association, ki synjuk nongñiah bad trai trok na ki District bapher-bapher halor ka mat jingtih maw tih shyiap da ki trai ri trai muluk ha ki jaka lajong ba khlem pyndonkam da ki kor ki bor.
Kane ka jingkhot u Myntri Rangbah ka dei kaba bteng ïa ka jingïalang kaba ar jong ka Special Committee ba la thaw da ka Sorkar Jylla ha ka jingïalam u Bah Prestone Tynsong, Symbud Myntri Rang-bah kum u Chairman kaba la pynlong ha ka 20 tarik u Kyllalyngkot 2025 ha kaba la donlang ki ophisar Sorkar, ki dkhot ka JAC ha kaba la ïathir ban pynjynsur ïa ki kyndon na ka Meghalaya Minor Minerals and Concession Rules 2016.
Ha katei ka Committee la ïakren halor ki kyndon 29, 30 bad 31 jong ka MMMCR 2016 ban pynsuk ïa kiba im da kaba tih maw kata halor ki mat ba ïadei bad ki rukom aplai Quarry Permit, ka jingsiew bad ban ïoh ‘Clearance’ bad ha kaba ïadei ka kam tih shyiap, la pyntip ba ka Sorkar ka la bthah ïa ka tnad Forest ban peit bniah namar ka don ka Sustainable Sand Mining Management Guidelines ka Sorkar India.
Haba kren sha ki nongthoh khubor hadien ka jingïakynduh bad u Myntri Rangbah, u Bah Egenstar Kurkalang nongïalam ka JAC u la ong ba la ïathir bniah bha, hynrei kam pat poi sha kaba kut ban shim ïa ka rai.
U la ong ba ka Sorkar Jylla ka dang ïakren bniah bad ka Sorkar India halor ki kyndon ka MMMCR 2016 bad Minor Minerals (Development and Regulation) Act 1957 ba don ki kyndon ba pyrkhing ha kaba ïadei bad ka Mariang.
U la ong ba u Myntri Rangbah u la ai ka kular ban ïakren biang ha ki sngi shwa ka jingrakhe ïa ka Sngi Laitluid ka Ri India halor kane.
Na ka liang u Bah D. Pyngrope, u la ong ba ka jingïaid lynti ka la long kaba kham slem bad kum ki nongïalam ka JAC kim pat ïoh ïa ka jubab kaba ai jingshai. U la ong haba ki ïakynduh ïa u Myntri Rangbah, u la pyntip ba la phah ïa ka kam sha ka tnad Forest ka Sorkar India bad imat ka la wanphai namar ka Sorkar India kam pat pdiang.
U la kyntu ïa baroh kiba ïadon bynta ban ïashah bad ka JAC ha ka jingpyntyllun ïa ka kam namar kam shym la don ka jingshong kli-kti.
U Bah Moslandar Marngar, Chairman ka MCTODA u la ong ba ka thong ka long ba hap ban weng ïa ka jingeh kaba la mih naduh ki Sorkar ba la dep namar bunsien kiba tih maw tih shyiap ki hap ban trei buhrieh kum ki nongtuh ha ki bor jong ka aiñ.
