Shillong, Nailar 07
Ka 4th Annual Meet jong ka All India Khasi Jaiñtia Christian Fellowship, kaba la long ha ka 01 tarik bad 02 tarik u Nailar 2026, ha KJCF Kolkata, ka la long kaba jop bad seisoh.
Ka phang pdeng jong kane ka jingïakynduh lang, kadei “Ka Jingïalong Shitylli ha U Khrist” (Ioannis 17:21), kaba dei ruh ka Motto jong ka AIKJCF.
Ha kane ka jingïalang la wan ïashim bynta da ki nongïalam, ki dkhot bad ki delegate na kylleng ki Jylla jong ka ri India ban ïaseng, ïaduwai bad ïasyllok lang para bangeit, khlem kano-kano ka jingsngewïapher ha ka niam lane ha ka Balang. La don ruh kiba la wan ïashim bynta na Shillong.
Ïa ka jingïalang la plie bad ïalam da u Bah R.P.Warjri, Chairperson ka AIKJCF, katba u Rev.Leslee Jana u la pynkyntang ïa ka da ka jingduwai.
Ha ka kyrwoh khubor ba la phah da ka AIKJCF lyngba u Chairperson jong ka, u Rev.Ps. Farwell T.M.Umlong, u la pyntip ba ha ka sngi ba nyngkong, la ïoh ïa ka jingïalap bad ka jinghikai na ka Ktien U Blei na u Rev. Ps. Barnold Wankhar ( Executive Secretary FGF) bad u Rev. Dr. B.J. Syiemlieh ( Former Principal John Robert Theological College, Mawklot ).
U Rev. Ps. Barnold Wankhar, u la ai mynsiem ïa ki bangeit, ba kin long kiba shisha ha U Trai bad ba kin ïaineh ha ka jingngeit, wat haba ki sah jngai na la ïing bad shnong.
Katba u Rev. Dr. B.J. Syiemlieh u la ai ïa ka paper presentation halor ka phang “Kawei ka Met, Shibun ki Dkhot” (1 Korinth 12:12-14). U la kren shaphang ki jingeh ba ki Jingïaseng Khasi ha kylleng ka ri India ki ïakynduh bad kumno yn lah ban jop ïa ki. Kum u wei na kiba la pule bad sah shabar jylla, u la ai mynsiem ïa ki para Khasi, ba kin bteng ban pynneh ïa ka jingïadei bad jingïatylli ha U Khrist. Kane ka jinghikai ka la long ka jingkyrkhu bad ka jingai mynsiem kaba khraw ïa ka AIKJCF.
Ha ka sngi kaba bud, kaba dei ruh ka Sngi U Trai, u Rev. Ps. Hamlet K. Rajee u la kren halor ka phang “Ka Jingïalong Shitylli ha U Khrist.” u la ban ba U Jisu Khrist hi u la dep duwai na ka bynta ka jingïalong kawei jong ki bangeit shuwa ba un leit noh na kane ka pyrthei.
Kumta ka kamram jong ngi ka long, ban ïai im ha ka jingïalong shitylli, da kaba batskhem ïa ka jingïalong kawei ha U Khrist. U la batai ruh ba ka jingïatylli kaba shisha ka wan na U Blei, ym na u briew.
La pynrhem ïa ka jingïaseng da ki jingrwai Praise & Worship na KJCF New Delhi, KJF Odisha, ki jingrwai shem mynsiem na KJCF Kolkata, ki Special Number na ki dkhot ka kynhun rwai na Shillong ka Pilgrim’s Voice, KJCF Kolkata bad na u wei u dkhot jong ka KJCF Vellore.
Ha kane ka jingïalang la pyllait paidbah ruh ïa ka Newsletter jong ka AIKJCF kaba kyrteng “Ka Diengpynïeng Sharak” Vol. 3 da u Rev. Ps. Hamlet K. Rajee, ( President & Senior Pastor, FGF ). Hashuwa kane, u Bah Ridon Kupar Kharlukhi, Editor jong ka Newsletter, u la ai khublei kyrpang ïa ki dkhot ka Editorial Board AIKJCF, kiba la trei shitom ban pynmih ïa kane ka Vol.3. La pynshngaiñ shuh shuh ïa ka jingïalang da ka jingdonlang u Tbn. Pochister Kharkongor, (IAS Retd.), President, HIAA Shillong, uba dei uwei na ki shakri jong U Blei, na ka Balang Presbyterian Laitumkhrah.
La sam ruh ïa ki memento sha ki nongkren, ki nongkitkam barim, u nongjop ïa ka Logo Competition jong ka AIKJCF bad sha ka KJCF Kolkata, kum ka dak ka jingsngewnguh ïa ka jingpdiang sngewbha bad ka jingshakri jong ki.
Ha ka jingïaseng kaba khatduh, la pynskhem bad aiti ïa ki nongkitkam bathymmai na ka bynta ka samoi treikam 2026-2028, kata u Rev. Ps. Farwell T.M. Umlong kum u Chairperson bad u Mr. H.B Sarubai kum u Secretary. u Rev. Costly Lyngdoh u la duwai pynkyntang ïa kine ki nongshimti kam thymmai. La ïoh ruh ïa ka jingai mynsiem na u Editor ka Newsletter sha ki nongkitkam, ki dkhot bad delegates halor ka bor ka jingduwai jong U Jisu Khrist (Ioannis 17:20-21), bad ka jingpynshlur na ka shithi u Paul u Apostol sha ki Nong Ephesos 1:13.
Ha kaba kut, u Rev. Reanald Nongphud, Chairperson barim ka AIKJCF (2024-2025), u la duwai bad ai khublei ïa baroh kiba la ïadon bynta ha kane ka jingïakynduh lang.
La pynkut ïa ka Annual Meet da ka jingïaroh ïa U Blei bad ka jingangnud ban nang pynkhlaiñ ïa ka jingïatylli jong ki Khasi, kiba sah ha kylleng ka ri India bad sha kiwei pat ki ri. U Rev. Ps. Farwell T.M. Umlong, Chairperson bathymmai jong ka AIKJCF, u la kyrkhu bad pynwai ïa kane ka Annual Meet 2026.
Ka AIKJCF, ka shim ruh ïa kane ka lad bad phah ka kyrwoh jingsngewnguh sha baroh ki Units & Partners, kumjuh sha ki para Khasi ha kylleng ka ri India, ha Jylla Meghalaya bad sha kiwei pat ki ri ka pyrthei, kiba la kynmaw kyrpang ïa kane ka jingïalang ha ki jingduwai jong ki.
