Shillong, Nailar 07
Ki nongdie madan na Laitumkhrah ha ka 07 tarik u Nailar 2026, ki dangïai bteng ban ïakhih hakhmat ka ophis treikam ka Shillong Municipal Board (SMB), ryngkat ki plakad, ban dawa ai ka jaka ba biang na ka bynta kiba die madan ha surok Laitum-khrah.
Ka jingleit ïakhih kiba shongdie madan ha ophis treikam ka Municipal, kadei hadien ba ka Sorkar Jylla ka la pynmih ka hukum ban kyndang lut ïa kiba die madan na Laitumkhrah nduh ka 17 tarik mynta u bnai Nailar.
Kumta kiba die madan, ki la pynpaw ka jingpyrshah bad jingbymhun halor kane ka jingleh ka Sorkar, nalor ba ka jaka ba ai ka Sorkar ha Brightwell ruh kim hun, bad dawa ban ai ka jaka ha Laitumkhrah hi ne ha kino kino ki jaka ba marjan, khnang ba ka ïew kan ïaid bad lah die.
Kane ka jingïakhih jong kiba die madan, ka la dap la 4 sngi lynter, kaba la sdang naduh ka 04 tarik u Nailar 2026, hynrei haduh mynta ka Sorkar bad na ka tnad Municipal, kim pat shym la sngap ïa ki jingdawa bad jingkwah jong ki.
Haba kren bad ka Kong Anjela Rngad, kaba dei ka nongmihkhmat ki nongdie madan, ka la ong ba ka jingpynkynriah ka Sorkar na Laitumkhrah sha Brightwell, kam ilong ka jaka kaba biang na ka bynta jong kiba die madan. Na ka liang ki nongdie madan kiba la ïakhih ki la ong, ba haduh mynta saw sngi ba ki ïakhih bad la phah ruh da ki jingthoh, hynrei kim pat ïoh kano-kano ka jubab, kumta ki la rai ba kin ïakhih beit man ka sngi tad haduh ka 17 tarik, kaba dei ka sngi ba ka Sorkar ka pynbna ban weng ïa ki na Laitumkhrah. Ki la ong ruh, ba lada ka Sorkar ka wan ban beh ha ka 17 tarik, kim treh ban leit bad kin pyneh beit ban shong kat bym pat ïoh ïa ka jaka kaba biang bad lada ka pynshitom bad leh da ka bor katno-katno ïa ki ruh, kin shah beit.
