Shillong, Naiwieng 13
Ka ïingbishar Meghalaya High Court ha ka Sngi Balang, ka la pynpaw ba kan shim noh da ka ‘Suo Motu Case’ lada ka kynrum kynram ka dang ïai bteng ha skulbah North Eastern Hill University (NEHU).
Ka ïingbishar ka dang bishar ïa ka PIL kaba pan ïa ka jingïarap jong ka ïingbishar ban pynmih ïa ki hukum kiba biang ban wanrah biang ïa ka jinglong-jingman ba jai-jai bad ban lah pynïaid beit ïaid ryntih ïa kane ka jaka pule, kaba la don hapoh ka jingkhang dam ba pura namar ka jingïakhih ba khlem buh por da ka seng ki samla pule ka North Eastern Hill University Student’s Union (NEHU SU) ba la kyrshan da ka Khasi Students’ Union (KSU-NEHU Unit) ha kine ki khyndai sngi ba la dep, kiba dawa ban weng noh mardor ïa u Vice Chancellor Prof PS Shukla, u Registrar bad u Deputy Registrar.
Ïa kane ka mat jong ka NEHU la wanrah da u Adv. P. Yobin hakhmat ka ïingbishar bad kyrpad ïa ka ïingbishar ban shim ‘suo motu case’.
Ha ka hukum, ka ïingbishar kaba kynthup ïa u Chief Justice Indra Prasanna Mukherji bad u Justice B Bhattacharjee, ki la ong, “Ngi shim judicial notice ïa ka jingshisha ba ka Sorkar Jylla ka la ai katto-katne ki jingai jingmut sha ka Sorkar Pdeng ban pynbeit ïa ka kynrum-kynram kaba mih ha kane ka skulbah mynta bad ba ka Sorkar Pdeng ka dang pyrkhat ïa ki lad ki lynti ban pynbeit ïa ki.”
“Namar ba ka jingpynïaid ïa ka skulbah ka dei kaba la khmih da ka Sorkar Pdeng, ngi don ka jingmut ban ai por shuh shuh ïa ka ban pynbeit ïa katei ka jingeh. Lada ki jingeh ki dang ïai bteng haduh ka tarik ba buh biang ïa ka jingbishar, ngin sa pyrkhat ban shim da ka suo motu case ïa kane ka kam bad ngin sa shim rai,” ka la ong.
Ka ïingbishar kala buh ban shong bishar biang ïa kane ka kam ha ka 20 tarik u Naiwieng, 2024.
Ka ïingbishar ka la bthah ruh ba u nongmudui un pyntip ïa kane ka hukum sha baroh kiba don bynta kynthup ïa ka Sorkar Pdeng bad Sorkar Jylla, u Vice Chancellor, ki seng nongtrei bad ki samla pule.
