Shillong, Naiwieng 13
U Vice-Chancellor (VC) ka North Eastern Hill University (NEHU), Prof. Prabha Shankar Shukla ha ka Sngi Balang u la thung ïa 2 ngut ki Pro-Vice Chancellor na bynta ar tylli ki shlem treikam ka skulbah ha Tura bad Shillong.
“Ha kaba pyndonkam ïa ka bor ba la pynkup hapoh ka Section 12(3) bad (13) jong ka North Eastern Hill University (NEHU) Act, 1973 NEHU Act bad ka Section (3) jong ki aiñ ka skulbah, u Vice-Chancellor ba donburom u sngewdei ban thung ïa ka Professor Fameline K. Marak na ka tnad pule Garo kum ka Pro Vice-Chancellor jong ka NEHU Tura Campus naduh ka 13 tarik Naiwieng, 2024 katkum ka jingmynjur jong ka Executive Council,” ong ka hukum na u Assistant Registrar (Planning) ha ka Sngi Balang.
Sa kawei pat ka hukum kaba la pynmih na u Assistant Registrar (Planning) ha kane kajuh ka sngi, ka ong, “Ha kaba pyndonkam ïa ka bor ba la pynkup hapoh ka Section 12(3) bad (13) jong ka North Eastern Hill University (NEHU) Act, 1973 bad ka Section (3) jong ki aiñ ka skulbah, u Vice-Chancellor ba donburom u sngewdei ban thung ïa ka Professor S.M. Sungoh na tnad pule Education, NEHU kum ka Pro Vice-Chancellor jong ka NEHU Shillong Campus naduh ka 13 tarik Naiwieng, 2024 katkum ka jingmynjur jong ka Executive Council.”
Kitei ki hukum ki ong ruh ba ka samoi treikam lem bad kiwei-kiwei ki kyndon haba ïadei bad ka jingthung ïa ki Pro-Vice Chancellor kan long katkum ka ‘Act’ bad ‘Statute’ jong ka skulbah kumba la pynkylla na ka por sha ka por.
Ka jingïakhih shah thngan ba khlem buh por ki samla pule ka skulbah hapoh ka lama jong ka North Eastern Hill University Students’ Union (NEHUSU) bad ka Khasi Students Union (KSU – NEHU Unit) kaba la sdang naduh ka 5 tarik u Naiwieng ka la kynjoh sha ka 9 sngi ha ka Sngi Balang.
Ki samla pule ki la dawa ïa ka jinghiar shuki jong u VC bad ban weng ïa u Registrar bad Deputy Registrar nalor kiwei kiba la shah kynnoh thung kam be-aiñ ha ka skulbah.
