Shillong, Naiwieng 13
Ka Joint Action Committee (JAC) jong lai tylli ki ‘Polling Station’ kaba kynthup ïa ka Misei, Mawsmai bad Langdongdai kiba hap hapoh ka West Khasi Hills District kiba kynthup ïa ki 21 tylli ki shnong ha ka step jong ka 13 tarik u Naiwieng 2024, ki la leit ban tur sha Khasi Hills Autonomous District Council (KHADC) da kaba pynlong ïa ka jingïaid paidbah naduh Umshyrpi shaduh khyrdop ka KHADC ha ryngkat ka jingrah ïa ki jingthoh halor ka jingdawa ba dei ban pynphai biang ïa kitei lai tylli ki shnong sha ka Mawshynrut MDC Konstitwensi na Rambrai-Jyrngam MDC Konstitwensi.
Haba ïoh jingtip halor kane ka jingjia, ki bor pulit ki la pynlong da ka jingsyrtap ha ki bynta ka Umshyrpi khnang ban pahara ïoh ka don kano-kano ka jingkulmar hapdeng ka jingïaid paidbah.
Na ka liang ka JAC ka la pynpaw ba ka pyrshah jur halor ka rai jong ka ïingdorbar thawaiñ ka KHADC kaba la mynjur lyngba ka Select Committee ïa ka jingtyrwa ban pynkynriah ïa ki 21 tylli ki shnong sha Rambrai-Jyrngam MDC Konstitwensi. Kane ka jingpynkynriah ïa kine ki shnong ka long kum shibynta ka rai jong ka Executive Committee ka KHADC ban pynbeit ryntih ïa ki shnong ha ki MDC konstitwensi bapher-bapher ha u snem ba la dep da kaba thaw ïa ka ‘Delimitation Committee’ ban leh ïa kane ka bynta ha kaba kane ka jingthaw ïa ka ‘Delimitation Committee’, ka la wanrah ka jingpynjlan ïa la ilekshon MDC kaba dei ban long mynta u snem hynrei la hap ban kynriah noh ha u snem 2025.
Hadien ka jingwan poi jong ka JAC hakhmat ka khyrdop ka KHADC, ki bor pulit ka East Khasi Hills District bad ki bor pahara ka KHADC, ki la ap pahara bha bad khlem ailad satia ïa ka JAC ban rung shapoh ka phyllaw ka KHADC kaba la pynlong ïa ka JAC ba kan jynrat ïa ka khyrdop jong ka KHADC hynrei kham hadien katto-katne por eiei, ka JAC ka la shim noh syndon da ka rai ban shong kyllaiñ mongor hapdeng ka surokbah kaba don mar pyrshah bad ka KHADC.
Ka JAC ka la pynpaw ba ka jinghap ban shong jong ki hapdeng katei ka surok ha ryngkat ka jingpyrta ïa ka sur jingpynrem, “Wat leh ïa ngi da ka bor”, ka dei ban pynpaw ïa ka jingshah khanglad jong ki ban rung shapoh ka KHADC. La sakhi ruh ba ha kane ka jingshong kyllaiñ mongor jong ka JAC ka la wanrah ka jingthut ha ka leit ka wan jong ki kali kiba kiew bad hiar na katei ka surokbah bad wanrah ïa ka jingdheng kali kaba jur ha katei ka bynta.
Ym tang katta, ka JAC ka la pyrta ruh da ki sur jingpynrem ïa u Chief Executive Member (CEM) ka KHADC, u Bah Pynïaid Sing Syiem bad ïa u Deputy Chief Executive Member ka KHADC, Bah Pynshngaiñ N Syiem. Pynban na ka liang kine ar ngut ki nongmihkhmat kim don satia hapoh ka shlem treikam ha katei ka por ba wan tur ka JAC.
Kham hadien katto-katne por ka jingshong kyllaiñ mongor ka JAC hapdeng ka surok, ki la wan poi ki bor pynïaid distrik ka East Khasi Hills District hapoh ka jingïalam u Majistor ha ryngkat ki bor pulit ban pynbor ïa ka JAC ba kan sangeh noh ka jingïakhih hapdeng ka surok hynrei na ka liang ka JAC ka la pyneh beit triang ban khih na katei ka jaka.
