Shillong, Naiwieng 14
Ka Sorkar Pdeng ka la pynmih ïa ka jingpynbna ban ñiew beaiñ san snem ïa ka Hynñiewtrep Natio-nal Liberation Council (HNLC) hadien ba la khmih bniah ïa ki kam pyntriem kum ki jingpynbthei bom bad ki kam dawa pisa.
Katkum ka jingpynbna kaba la pynmih ha ka 13 tarik Naiwieng, 2024 da ka Ministry of Home Affairs, la ong ba ka HNLC ka la pynbna ïa ka jingthmu ban pynlong la ka jong ka ri ïa ki jaka kiba hap hapoh ka Jylla Meghalaya, kham bun ki dei kiba shong ba sah da ki jaitbynriew Khasi bad Jaiñtia jong ka ri India.
La ong ba ka HNLC ka bteng ban byrngem bad lehbor ïa ki paidbah ha ki kam dawa pisa na bynta ka seng bad ki pyneh ïa ka jingïadei bad kiwei ki seng lehnoh kiba don ha ka thaiñ Shatei Lam Mihngi ban pyntreikam ïa ki kam dawa pisa bad jingbyrngem.
La pynbna ruh ba ka HNLC ka donbynta ha kumba 48 tylli ki kam runar kynthup bun tylli ki jingpynbthei bad jingbuh ïa ki tiar pynbthei ha ka Jylla naduh ka 16 tarik Naiwieng, 2019 haduh 30 tarik Jylliew, 2024.
Ha ka jingpynbna ka Sorkar Pdeng ka la ong ruh ba ha kine ki por naduh ka 16 tarik Naiwieng, 2019 haduh 30 tarik Jylliew, 2024, la shah kem 73 ngut ki dkhot ka HNLC bad 3 ngut ki dkhot ki la pyndem. La ong ba ka Sorkar Jylla ruh ka ai jingmut ban pynbna ïa ka HNLC kum ka seng beaiñ katkum ki kyndon ka Unlawful Activities (Prevention) Act, 1967 (37 of 1967).
Kumta ïa kine ki kam ka HNLC, ha ka jingmut jong ka Sorkar Pdeng ki long kiba buh jingma ïa jinglong laitluid bad long kawei ka ri India bad lada ym tehlakam noh, ka HNLC ka lah ban ïohlad ban synrop biang ban pynkhlaiñ, ban pynbun ïa ki dkhot, ban thied ki tiar ïaleh, yn duh ïa ka jingim ki briew bad ki nongpahara bad ki jingdon-jingem ki ban nang pyntyllun ïa ki kam ïaleh pyrshah ïa ka ri.
Namarkata, ka Sorkar Pdeng ka sngew dei ba kitei ki daw bad nongrim kiba la kdew ki dei kiba donkam bad ïahap ban pynbna ïa ka HNLC lem bad kiwei ki kynhun kiba dei ki shnat jong ka seng ban shah ñiew beaiñ kumba la pynkupbor da ka proviso sub-section (3) jong ka section 3 hapoh ka Unlawful Activities (Prevention) Act naduh ka 16 tarik Naiwieng, 2024 bad kan bteng haduh san snem.
Ka MHA ka la pynmih ïa kane ka jingpynbna lyngba u Additional Secretary, u Piyush Goyal.
