Shillong, Naiwieng 14
Ka Hynñiewtrep Youths’ Council (HYC) Education Cell ha ka 14 tarik u Naiwieng 2024 ka la leit ban ïakynduh ïa u Myntri ka tnat pule-puthi ka Sorkar Jylla, u Rakkam Sangma ha kaba ïadei bad ka jingslem jong ki samla pule ban ïoh ïa ka bai bam na ka bynta u snem 2023-2024.
Wat la na ka liang ka seng ka khlem ïoh satia ban ïakynduh markhmat bad u Myntri ka tnad pule-puthi ka Sorkar Jylla hynrei ka la hap ban shu buh noh da ka dorkhas ha ka ophis treikam jong u Myntri ha kaba ïadei bad kane.
Haba kren sha ki lad pathai khubor, u Joint Secretary ka HYC Sengkmie, u samla Yoodahunki Shylla u la ong ba ka seng ka la ïoh ban pdiang ïa ki jingud-jingnam na ka liang ki samla pule kiba la pynpaw ïa ka jingeh halor ka jingset jong ka Sorkar ban pyllait ïa ka baibam jong ki samla pule ha kaba ka la pynlong ïa ki samla pule ba kin shem jingeh shikatdei eh ban siew ïa ki bai klas jong ki.
U samla Yoodahunki u la ong ba kane ka jingpynslem jong ka Sorkar ban siew ïa ka baibam ki samla pule kam dei shuh ha ka sien kaba nyngkong hynrei kum kane ka jingjia ka la ïai jia na kawei ka por sha kawei pat bad hap ban shu ïai pynkynmaw ïa ka Sorkar da kaba phah ïa ki shithi ban pyllait noh mardor ïa ka baibam jong ki samla pule
Nalorkata, u la ong ba ka Sorkar ka shu ap khmih lynti ba na ka liang ki seng ne ki riew paidbah kin mih madan ban dawa halor kane bad ka dei tad haduh kata ka por ba na ka liang ka Sorkar kan sa shimkhia ban pyllait noh ïa ka baibam ki samla pule.
“Na ka liang jong ngi ka seng, ngi sngewkhia haba ngi ïohi ïa ka jingleh jong ka Sorkar ba manla ka por ka la ju ïai leh kuman bad mutlop bad ka Sorkar ka la shu ïai ap beit ïa ka jingmih ki seng ne ki riew paidbah ban buh ïa ka jingujor pyrshah ïa ki”, ong u samla Yoodahunki.
Shuh-shuh utei u samla u la ong ba katkum ka jingïoh jingtip jong ka seng, ka Sorkar Pdeng ka la dep ban pyllait lut baroh ka baibam jong ki samla pule naduh u bnai Nailur hynrei na ka liang ka Sorkar Jylla pat ka la pynsahkut ïa kane ka baibam ki samla bad kane ka jingleh jong ka Sorkar ka la wanrah jingeh shikatdei eh ïa ki samla kiba wan na ki longïing-longsem kiba duna ha ka ïoh-ka kot.
Halor kane ka bynta, ka seng kan aipor haduh 10 sngi ïa ka Sorkar ba kan pyllait noh ïa kane ka baibam ki samla pule bad ong ba lada kane ka jingdawa ban pyllait noh ïa ka baibam jong ki khynnah kam urlong hapoh ka 10 sngi, na ka liang ka seng ka la byrngem ba kan sa pynlong da ka jingïakhih ne da ka jingleit ban khang tala ïa ka ophis jong u Directorate of Higher and Technical Education (DHTE).
