Shillong, Naiwieng 14
Ka Ministry of Education jong ka Sorkar Pdeng ha ka Sngi Palei ka la thung ïa ka ‘Inquiry Committee’ ka ban tohkit halor ki kynrum-kynram bad ki jingkynnoh ba ka don ka jingpynïaid bakla bad ka jingbym biang ka rukom pynïaid hapoh ka skulbah North Eastern Hill University (NEHU), Shillong.
Kane ka jingshim rai ka Ministry of Education ka Sorkar Pdeng ka la long halor ki jingeh kiba jur kiba la pynpaw da ki samla pule, ka seng ki samla pule, bad ki khubor ba la mih ha ki lad pathai khubor ha kaba ïadei bad ki kynrum-kynram ha ka skulbah NEHU.
Kane ka hukum na ka Ministry ba la soi da u D.K Himanshu, Under Secretary ka Sorkar India, ka la wan 10 sngi hadien ka jingshong shah thngan ba khlem pud jong ki samla pule North Eastern Hill University Students Union (NEHUSU) ba la kyrshan da ka KSU-NEHU Unit, bad ka jingkhang dam ïa ka skulbah ban pyrshah ïa ka jingbym ler treikam jong u Vice Chancellor, u Registrar bad Deputy Registrar, kaba la ktah jur ïa ka jingtreikam jong ka NEHU.
Kane ka ‘inquiry committee’ kaba la thung da ka Ministry of Education kan kynthup ïa ar ngut ki dkhot, ki ban pynïaid shakhmat ïa ka jingtohkit kaba bniah halor ki jingkynnoh baroh.
Ki dkhot ba la thung da ka Ministry ki long u Prof. D.P Singh, Chairman barim ka University Grant Commission (UGC) kum u Chairman ka Inquiry Committee bad u Prof. Dilip Chandra Nath, Vice-Chancellor barim ka Assam University kum u dkhot ba-ar jong ka committee.
Ka committee kan tohkit ïa ka jingkynnoh thung kam beaiñ kynthup ïa ka jingthung kam ïa u Registrar bad u Deputy Registrar, ïa kiba la kam ba ki dei ki daw bah halor ka jinghiar kyrdan jong ka skulbah NEHU kaba la paw ha ka National Institutional Ranking Framework (NIRF).
Ka committee kan tohkit ruh ïa ki jingkynnoh halor ka jingbym lah pynbiang ïa ki jingdonkam ba kongsan ha ka skulbah kynthup ïa ki jingtei, kaba la ktah ïa ka pule puthi bad ka bha ka miat ki samla, ka jingsngap mynthi jong u Vice Chancellor ïa kiba bun ki jingujor bad ki dorkhas na ki seng ki samla pule kynthup ka jingdawa ban wanrah ïa ki jingkylla kiba donkam.
Ïa kane ka committee la bynshet ban tohkit ïa kawei-pa- kawei ka jingujor bad ba ka dei ruh ban pynbiang bad aiti ïa ka kaiphod ba pura hapoh ka 15 sngi, kynthup ki jingai jingmut ban lah pynbeit ïa ki kynrum-kynram baroh.
Ka Ministry ka la bthah ïa ki bor pynïaid jong ka NEHU ba kan ai ïa ka jingïatreilang kaba pura bad kane ka committee, kynthup ka jingpynbiang ïa baroh ki kot ki sla bad kino-kino ki jingïarap kiba donkam na ka bynta kane ka jingtohkit.
