Shillong, Naiwieng 14
Ka Sorkar Jylla ka la pynjlan biang ïa ka por ban ai kaiphod da ki lai tylli ki Regional Committee sha ka 31 tarik Nohprah, 2024. Kane ka jingpynjlan por ka long katkum ka jingpynbna ba la pynmih da ka tnat Home (Political) ha ka 13 tarik Naiwieng, kaba la ai por shuh ban pynïaid ïa ki kam pynbeit pud ha ki jaka ba dang sah bad ka Assam.
Kane ka jingpynjlan por imat ka lah ban dei namar ka jingsahteng ka jingleit hiar jurip ïa ka thaiñ Langpih, ka jaka khappud ka West Khasi Hills kaba jur bha ka jingïakynad.
Dang shen, u Chairman ka Regional Committee ka West Khasi Hills, Bah Paul Lyngdoh, u la buh dak jingkylli ïa u Chairman ka Boundary Committee ka Assam halor ka jingpynslem ban hiar jurip lang ïa ka Langpih, bad ong ba ka jingbym ai jubab jong ka Assam ka la pynslem ïa kane ka kam.
Ki committee jong ki ar Jylla ki la mynjur nyngkong ban ïa hiar jurip ïa ka Langpih bad ban ïakynduh ïa ki nongshong shnong lem bad ki nongïalam ka thaiñ shuwa ba kin aiti ïa ka kaiphod ba khatduh sha la ki jong ki Myntri Rangbah.
