Shillong, Naiwieng 14
U Myntri barim ka Sorkar Jylla uba khmih ïa ka tnat Pule-Puthi, Bah Lahkmen Rymbui u la ong ba ka Sorkar India ka la dei ban tuklar mardor ïa ka jingjia ha skulbah North Eastern Hill University (NEHU).
“Ka long kaei-kaei kaba sngewsih ban ïohi ba ki samla pule ki hap ban mih shabar na ki kamra klas ban ïakhih bad shah jingit, kumta ka Sorkar India khlem da donkam ban ap ïano-ïano ruh ka la dei ban tuklar mardor”, la ong u Bah Rymbui uba dei ruh u MLA ka Amlarem.
U Bah Rymbui u la ong ba ka NEHU ka dei ka skulbah kaba pawnam bad kum kine ki jingjia kim dei ban nang ïai bteng, namar kane kan ktah ïa ka lawei ki samla bad khamtam ïa ka rukom pyrkhat ki samla pule.
“Kane ka jingïakhih kan ktah bha ïa ki khynnah, kan pynpyrkhat ba ka NEHU kam dei shuh kata ka jaka pule bniah, pynban kin shim ba ka dei ka jaka ba pyndonkam da mano-re-mano na ka bynta ka jingmyntoi politik”, la ong shuh shuh u Bah Rymbui.
