Jowai, Naiwieng 14
Ka ding kaba la klang jur bha ka la ïoh ban bam naphang ïa ki ar tylli ki dukan kiba don harud surokbah NH-6 ha ka shnong Mookyndur ha West Jaiñtia Hills District, kaba la jia ha ka 14 tarik mynta u bnai.
Kine ki ar tylli ki dukan ki dei jong ka Kong Helen Ksoo bad ka Kong Epormi Ksoo kiba dei shipara na ka shnong Moodymmai.
Haba ïakren bad u Waheh Shnong ka Mookyndur u Ma Ninderson Suting u la ïathuh ba kane ka jingjia ka la jia ha ka por kumba 12:30 mynsngi.
U la ïathuh ruh ba da ka jingkloi jong ki para marjan ryngkat ki samla ka shnong ban ïaleh ban pynlip bad tem ïa ka ding, kane ka dukan ka la lait na ka jingshah bam duh.
Ka khubor na ki pulit ka ïathuh ba shuwa ban wan ka kali pynlip ding, ka la don ka jingpyrshang ban pynlip ïa ka ding da kawei ka kali kit um. Ka ding ka la pur na ka dukan jong ka Kong Epormi bad hadien ba la wan ki pulit ka Fire and Emergency Service ki la lah ban pynlip noh ïa ka ding.
Ha ka jingtohkit la suba ba ka jingkem ding ka dukan ka lah ban dei na ki ar tylli ki bateri ba la pyndonkam ban charge na ka solar. Ha kane ka jingjia ka dukan ka Kong Helen ka la julor khait, katba ka dukan jong ka Kong Epormi ka la julor tang shibynta.
La ïathuh ba ka jingjulor jong kitei ki ar tylli ki dukan na ka jingshah bam ha ki thylliej ding kala kot sha kumba T.7 lak eiei.
