Shillong, Naiwieng 14
U MLA ka Congress uba dei u Chief Whip ka Liang Pyrshah hapoh ka Ïingdorbar Thaw Aiñ, Bah Ronnie V Lyngdoh u la kynnoh ba ka jingmih ka kynrum-kynram hapoh ka skulbah North Eastern Hill University (NEHU) ka la sdang naduh ba la ïoh synshar ka seng BJP ha ka Sorkar Pdeng.
Haba kren halor ka kynrum-kynram kaba la mih mynta hapoh NEHU, u Bah Ronnie u la ong ba ka NEHU ka dei ka skulbah kaba pynïaid bad khmih da ka Sorkar Pdeng bad ka BJP kaba ïalam ïa ka Sorkar ha Delhi ka la wanrah da u Vice Chancellor u bym don ka jingtip ei-ei ban pynïaid ïa ka skulbah.
“Nga ïoh jingtip ba ki briew ki bym biang bym tip ei-ei ki la shah thung kam tang namar ba ki dei na ka seng RSS bad BJP, naduh ba la wan ka BJP ha ka bor ki mih kine ki kynrum-kynram katba mynshwa pat ym ju don ei-ei”, u la ong.
U la ong ba ka BJP kan ïaleh katba lah ban bat ïa kino-kino ki jaka pule ban pynïaid shakhmat ïa ki jingthmu jong ka.
U la ong ba ki samla pule ki la leh ïa kaba dei tam da kaba ïeng pyrshah ïa kane ka mat.
“Nga ai jingïaroh ïa ki samla pule ka NEHU kiba la ïakhih. Ailad ba katei ka skulbah kan dei ka jaka pule ka jaka wad bniah, ym ka jaka ban pynïar ïa ka rukom pyrkhat ki seng saiñpyrthei”, la ong u Nongïalam ka Congress.
U la ong ruh, “Hato ki pyrshang ban kyntiew ïa ka jingnang-jingstad ha NEHU ne lyngba ka skulbah ki pyrshang ban pynïar ïa ka rukom pyrkhat jong ki, kaba dei ka jingma ka bakhraw”.
U Bah Ronnie u la ïathuh ruh ba u la kyntu ïa u MP ka Congress na Tura, u Saleng A Sangma ban shim khia ïa kane ka kam bad ka tnat ba dei khmih, wat shaduh u Myhntri Rangbahduh ka ri, ban pynbeit noh ïa baroh ki jingeh kiba la mih khnang ba ki samla kin lah ban leit phai biang sha ki jingpule.
