Kyntait ka Prof. SM Sungoh ban shimti kum ka Pro-VC ka NEHU Shillong Campus

Shillong, Naiwieng 14

Ka Prof. Sherwin May Sungoh kaba la shah thung kam kum ka Pro-Vice Chancellor jong ka North-Eastern Hill University (NEHU) Shillong Campus ïa kaba la thung da u Vice-Chancellor katei ka Skulbah, u Prof. Prabha Shankar Shukla, ka la rai ban ym pdiang satia ïa kane ka jingshah thung kam jong ka kum ka Pro-Vice Chancellor hapoh katei ka Skulbah namar kam kwah ba kiwei kin khyrwait shabi ïa ka.

Ka Prof. Sungoh ka la pynbna ïa kane haba kren sha ki samla pule bad ki nonghikai kiba la pynlong ïa ka jingshong shah thngan kaba khlem buh por kaba la sdang naduh ka 5 tarik u Naiwieng 2024 hakhmat ka shlem treikam jong u Vice-Chancellor ha ka Sngi Palei jong ka 14 tarik u Naiwieng 2024.

Ka Prof. Sungoh ka la ong ba ka rai jong ka ban pdiang ïa kano-kano ka jingthung kam kan shong ha ka rai jong ki nongshimbynta kiba don hapdeng ka jingïakhih.

“Ïa ka jingpynbna la soi da u Assistant Registrar In-charge, ka kyrdan kaba nga ngeit ba ka duna ïa ka bor kaba biang ban pynmih ïa kum kane ka jingpyntip. Khlem ka jingpynbna ba thikna na ki lad pathai khubor kiba biang, kane ka khubor kam don jingkhia eiei na ka bynta jong nga,” ka la ong.

Katei ka HoD jong ka tnat Education ka NEHU, ka la ong ba ha ka jingim jong ka baroh kawei, ka la aiti lut na ka bynta ka jingbha jingmiat jong ki samla pule hapoh ka skulbah bad ka jingjop jong ka jaka pule baroh kawei.

“Ngan ym ailad ba ngan shah pyndik ha ki ‘riewshimet kiba pyndonkam da ki lad ki lynti kiba shyrkhei. Nga kyntait ban long ka nongshah pyndonkam ha kano-kano ka jingthumu shimet ne ka saiñ pyrthei”, ka la ong.

Ka Prof Sugnoh ka la ong ba ka kwah ban pynpaw ïa ka jingai jingkyrshan bapura ïa ka kam jong ki samla pule jong ka skulbah bad ong ba ka buh hakhmat eh ïa ka jingbha jingmiat jong ki samla pule.

“Nga dang ïaineh ha ki jingmyntoi jong ki bad ngan ym shim satia ïa kano-kano ka sienjam kaba lah ban pynduhjait ïa ka jingaiti jong ki ïa ka kam kaba ngi baroh ngi ïasam lang,” la ong ka Prof Sungoh.

Da kaba pynpaw ïa ka jingkyrmen ba kane ka skulbah kan ïoh biang ïa ka burom kaba mynshwa kum ka skulbah kaba pawnam ka ïoh.

Kham mynshwa, na ka liang ka NEHUTA ka la pynpaw ba ka Prof. Sungoh kan nym dei satia ban pdiang ïa katei ka jingthung kam da u Prof. Shukla.