Jowai, Naiwieng 14
Ka Khasi Students’ Union (KSU) Jaiñtia Hills District Unit ha ka 12 tarik Naiwieng ka la hiar jurip naduh Lumshnong shaduh Malidor ban jurip ïa ka jinglong jingman jong ka surokbah NH-6.
Ha kane ka jinghiar jurip la ïalam da u samla Phanuel Tongper uba dei u Environment Secretary, u samla Skhem Lapasam Organising Secretary KSU Narpuh Circle bad ki katto katne ki dkhot ka KSU Narpuh Circle.
Ha kane ka jinghiar jurip, ka la lap ba la don ka jingpyntrei ïa ka surok haduh Sonapyrdi. Hynrei ka KSU kala ong pat ba katei ka jingtrei ka long kaba torti bha, namar kum ha Tongseng la siang da ka dewbilat tang shiliang bad iehnoh khlem pyntrei shuh.
Ka KSU ka la ong ba ka jingpyntrei kaba ha kane ka rukom ka wanrah jingdheng kali kaba manla ka sngi, namar ka jingbym don ki nongpynïaid kali ne traffic.
Shuh shuh ka KSU kala ong ba naduh na Sonapyrdi shaduh Malidor pat ym don kano kano ka jingpyntrei ïa ka surok hynrei la don tang ka jingtrei ‘side drain’ ne ki nala hangne hangtai bad buh ruh ka jingkylli, shaei u kontraktor ba shimti ban pyntrei ïa kane ka surok naduh Thangskai, Lumshnong shaduh Malidor.
Ha ka jingtip jong ka seng naduh Thangskai shaduh Malidor, ka NHAI ka ai kontrak sha ka Dhar Construction company, hynrei kynjah jar ym don eiei bad lada kane ka company kam don briew ne mashin ban trei, balei ka Sorkar ne ka NHAI kam ai sha kiwei kiba kot bor bad biang ki tiar ki tar ban trei ïa kane ka surok.
Ki khynnah skul ki hap ban mad ïa ka jingkthang ban ïaid lyngba kane ka surok kaba pum pum naduh Thangskai shaduh Malidor.
Ka Sorkar Jylla bad ka NHAI ki dei ban ïathuh shai ba hato kin pyntrei ne kin ym pyntrei ïa kane ka surok khnang ba ka seng kan tip ban leh ïa kaba donkam, la ong ka KSU.
