Shillong, Naiwieng 14
Ka kyrtong ka National People’s Party (NPP), Dr. Mehtab Chandee Sangma ka la pynpaw ka jingkyrmen skhem ban poi sha ka thong ha kane ka ilekshon shiteng samoi ha Gambegre konstitwensi.
“Nga khmih lynti ïa kaba bha, ka lyer ka biang bad ngi la trei shitom. Kumta, nga khmih lynti ba ki paidbah kin ai ïa ka rai kaba biang,” ong ka Dr. Sangma haba kren hadien ba la dep thep ‘vote’ ha ka Sngi Balang.
Haba kren halor ki jingangnud ba hakhmat jong ki nongshong shnong ka Gambegre, ka la ong, “Hooid, nga sngew ba kane ka long kawei na ki daw namar phi ïohi ba nga dei ka kyrtong ba dang thymmai bad ngam shym la ïoh por bha ban pynkhreh na bynta ka ilekshon, kumta nga ïoh tang kumba 3-4 bnai ban ïalap.”
Ka la ong ruh ba ha kitei ki por, ka la sngewthuh ba ki jingeh ki bun naba ka konstitwensi ruh ka long kaba heh bad kumta haba peit ïa kiei-kiei baroh, ka sngew ba ka dang don shibun kaba hap ban leh bad ki paidbah ruh ki don ka jingkhmih lynti bad ki kwah ban ‘vote’ na bynta ka roi ka par.
“Ki khmih lynti shibun na nga bad nga kyrmen ba nga lah ban pynurlong ïa ki,” ong ka Dr. Sangma kaba dei ruh ka kurim u Myntri Rangbah ka Jylla, u Conrad K. Sangma.
Haba kylli, ka la ong, “Lada ka risol ka bha bad lada nga lah ban shakri ïa ki paidbah bad ki paidbah ki ‘vote’ ïa nga, kata ka banyngkong eh ba ngan phai khmat ka long halor ki jingdonkam ha ka jingim ba man ka sngi…nga la shem kiba bun ki jingeh ha kylleng ki shnong bad ngi lah ban ïohi ba ki jingdonkam ha ka jingim ba man ka sngi kim biang – ka bording, surok, umbam-umdih bad ngan buh hakhmat eh ïa kine ban pyntikna ba man la ki nongshong shnong ki lah ban ïoh ïa kine ki jingdonkam baroh…ban pynbiang sha ki ïa kine.”
Shuh shuh haba jubab, ka la bynrap, “Hooid, ka lyer ka biang, bad ngi kyrmen ban poi sha ka thong – nga tikna ba ki paidbah kin ai lad ïa nga ban shakri ïa ki.”
