Shillong, Naiwieng 14
Hadien 9 sngi ka jingïaid lynti jong ka jingshong shah thngan kaba khlem buh por da ki samla pule ka Skulbah ka North-Eastern Hill University (NEHU) kiba don hapoh ka shatri jong ka North-Eastern Hill University Students’ Union (NEHUSU) bad ka Khasi Students’ Union (KSU) NEHU Unit, ha ka janmiet jong ka 14 tarik u Naiwieng 2024, u President ka NEHUSU, samla Sandy Sohtun u la shitom jur hadien ka jingshitom eh jong u ha ki bynta jong ka kpoh namar ka jingshah thngan kaba la palat da ki sngi.
Kum ban shu kdew hangne, na ka liang ki samla pule ka skulbah NEHU ki la pynlong da ka jingïakhih shong shah thngan kaba khlem buh por hapoh ka phyllaw jong ka skulbah naduh ka 5 tarik u Naiwieng 2024 ban dawa hiar shuki mardor ïa u Vice-Chancellor (VC) ka skulbah, Prof. Prabha Shankar Shukla hadien ka jingdonkti jong u ban thung kam beaiñ ïa u Registrar, Deputy Registrar bad kiwei ophisar. La dawa ba u dei ban weng kam mardor ïa ki nalor ka jingmih ki jingkynnoh pyrshah ïa u ba u dei u VC uba isih ïa ki trai ri-trai muluk bad ruh halor ka jingbym treh thung kam ïa ki Pro Vice-Chancellor ha Shillong bad Tura NEHU Campus da ki trai muluk-trai jaka nalor ki kiwei-kiwei.
Kumta, la pynkit noh ïa utei u nongïalam sha Shillong Civil Hospital khnang ba un ïoh ïa ka jingsumar kaba kyrkieh ha ryngkat ka jingsynran lem da ki para nongïalam.
