Nongstoiñ, Naiwieng 14
Wat lada ym pat tip haduh mynta lano kan long ka ilekshon jied ïa ki nongmihkhmat sha ka ïingdorbar Khasi Hills Autonomous District Council (KHADC) hynrei katba nang mih ki sngi ka lyer jong ka ilekshon MDC ka la nang shongshit khamtam ïa ki seng saiñ hima-sima kumno ban pynkhreh na ka bynta kane ka ilekshon.
U Bah Bormanding Nonglang, President ka District Congress Committee (DCC) ka West Khasi Hills haba kren ha u nongthoh khubor halor kane ka phang u la ong, na ka liang ka DCC ka la don ïa ka jingpynkhreh na ka bynta ki lai tylli konstitwensi, ka Nongstoiñ, Rambrai bad ka Mawshynrut.
“Haduh mynta, ngi la long kiba la khreh ïa baroh lai tylli ki konstitwensi, ha kaba u la ong ba ha Rambrai konstitwensi ngi la don ïa u kyrtong ba ka Block ka la dep ban mynjur bad ban pyntip naduh ba la dep ïa ka ilekshon MLA ha u 2023 na ka liang jong ka Rambrai ki la pyntip ïa u Bah Bormanding ba un long u kyrtong ha ka ilekshon MDC,” ong u Bah Bormanding.
Shuh shuh u la ong ruh ba ha kaba ïadei bad ka Mawshynrut konstitwensi, na ka liang ka jong u kum u District President u la dep bthah ha baroh lai tylli ki Block kiba hap hapoh ka West Khasi Hills ba ha une u bnai Naiwieng baroh kin pynpoi ïa ki thup jong ki kyrtong bad ha Mawshynrut haduh mynta kaba la wan poi ka kyrteng ha ka District Congress Committee lyngba jong u District President ka dang dei tang ka kyrteng jong u Bah Fourteenson Lyngkhoi.
Ha kajuh ka por u la ong ruh ba ha Nongstoiñ konstitwensi ruh ka la don ïa u kyrtong hynrei ïa mynta ym pat shym lah ban ïathuh hynrei ha kine ki khyndiat sngi yn sa ïa shong ban pynbit pynbiang.
U la ong ruh ba katkum ka jinglum jingtip, ka Congress wat lada kam don shuh ki MDC, MLA ha West Khasi Hills hynrei kam shym la shongthait bad ka la ïaid shakhmat ban nang pynkhlaiñ shuh ïa ka seng. Nangta u la ong kum ki Nongïalam ki la pyrshang ban leit ïakynduh ïa ki ‘riew rangbah bad kiwei-kiwei hapoh lai tylli ki konstitwensi bad na ka liang ka Congress ka dang don ka jingkyrmen bad ka jingsngew skhem.
Haba kren halor ka jingkiew jong ka VPP, u Bah Bormanding u la ong, “Ngin ieh ha ka jingstad jong ki paidbah ïano kin rai hynrei ka Congress ruh ka don ïa ka jingkyrmen ba ha kine lai tylli ki konstitwensi kan (Congress) ïoh ïa ka jingjop ha kane ka ilekshon MDC.
