Shillong, Naiwieng:
Ka Durbar Shnong Mawtawar kan pynlong ïa ka jingpynkhuid shnong ha ka 16 tarik, Nohprah, 2024 naduh ka por 9.00 baje mynstep bad yn khang shnong ha katei ka sngi pynkhuid shnong.
Ha ka kynta pynkhuid shnong yn khang lut ïa baroh ki lynti shnong (Internal Roads) lait noh ïa ka surok Main Road. La bthah ruh ïa kiba buh maw, buh shyiap bad kiwei kiwei ha ki lynti shnong ki dei ban weng noh shwa katei ka sngi pynkhuid shnong.
La bthah ruh ïa ki trai jaka kiba don jaka hapoh u pud synshar jong ka Durbar Shnong Mawtawar ki dei ban wan pynkhuid noh ha shwa katei ka sngi pynkhuid shnong na ka bynta ka jingkhuid bad khamtam na ka bynta ka jingshngaiñ ka jaka jong ki.
La kyrpad ïa baroh ki nongshong shnong, ki khynnah, samla bad rangbah ban ïamih ryntih ha katei ka sngi pynkhuid shnong.
Kumba ngi tip ka jingkhuid jingsuba ka dei ka spah bah ka ban ïalam sha ka jingkoit jingkhiah bad ka phuh ka phieng ha ka shnong ka thaw, khlem pep ka jingïasnohktilang da baroh ki nongshong shnong bad ki trai jaka kan pynlong ïa katei ka sngi pynkhuid shnong kaba jop.
