Shillong, Naiwieng 15
U Working President ka United Democratic Party (UDP), Bah Titosstarwell Chyne u la ong, namar ba ka aiñ kyntiap seng kam don ha ki district council, ka seng ka hap ban shaniah beit ha ki MDC ba kin ym phet na ka seng ynda ki la jop.
Haba kylli, u la ong ba ha ki snem ba la dep ka UDP ka la pyrshang ban wanrah ka jingïateh da kaba soi ïa ka kynja soskular ba kim dei ban phet seng hadien ba ki la jop ïa ka ilekshon, hynrei kane kam lah treikam ne ïeng satia.
“Kumba ka long mynta ngi hap ban shu shaniah beit ha ki MDC kiba la shim ïa ka lyngkor ba kin bat ïa ka nongrim”, u la ong.
Ha kajuh ka por u Nongïalam ka UDP uba dei u MDC na Sohra bad Nongïalam Liang Pyrshah ha KHADC, u la ong ba ha kane ka samoi treikam kaba mynta ym don uwei ruh u MDC uba jop na ka UDP ba un phet noh na ka seng, wat hadien ba la mih ka jingkylla ha ka saiñpyrthei ha KHADC.
Lah ban pynpaw ba ka jingbym don ka aiñ kaba khang ïa ki MDC ban kyntiap seng na ka por sha ka por la sakhi ba ki MDC kiba jop na kawei ka seng ha ka por ilekshon ki ju leit pynïasoh noh sha kano-kano ka seng kaba ïoh ïa ka bor ban pynïaid ïa ka executive committee. Kane jingbym don jong ka aiñ khang kyntiap seng hapoh ka Khyrnit Hynriew ka la wanrah jingeh ïa ki seng saiñpyrthei bad kumjuh ka pynkulmar ïa ki paidbah nongjied.
Lah ruh ban pynkynmaw ba na ka liang ki seng saiñpyrthei hapoh ka Jylla ki la ai jingmut ruh sha ka Parliamentary Standing Committee halor ka jingpynkylla ïa ka Khyrnit Hynriew ban bsut noh ïa ka aiñ kum ka Khyrnit Shiphew kaba khang ïa ki MLA ban ryngkang dieng kper katba mon, namar kim lah ban tip ïa ka jingmut jong uno-uno/kano-kano MDC kiba lah ban shim ïa ka rai marwei.
Ha kawei ka liang pat, u Bah Titos u la ïathuh ba ka seng ka la pynkhreh bha ïa ka ilekshon MDC ka ban sa long, bad pyntip ruh ba ka seng kan sa pynbna paidbah ïa ki kyrtong ha ka taïew banyngkong u Nohprah.
Ha kaba ïadei bad ka jingïatreilang bad ka HSPDP hapoh ka RDA, u nongïalam ka UDP u la ong ba ka jingïatreilang kan don hynrei kin don pat ki konstitwensi kiba hap ban ïakhun paralok namar ka jingdon lypa ki MLA bad ki MDC ha kita ki konstitwensi.
