Shillong, Naiwieng 15
Ka jingpyntreikam pura ïa ka Seaplane lane ka liengsuiñ duriaw kaba hiar ha um kan shim por sa katto-katne ban pynbit-pynbiang ïa ki jingdonkam kynthup ka jingsoi ïa ka Memorandum of Understanding bad ka kynhun ka ban wanrah ïa ka liengsuiñ.
Ha ka sngi ba sdang ban pyrshang ïa ka jinghiar kane liengsuiñ duriaw ha pung Umïam ha ka 14 tarik mynta u Naiwieng, u Myntri ka tnat Civil Aviation, u Kinjarapu Ramohan Naidu u la wan ban sakhi lang ha Umïam ha ka jingdonlang u Myntri Rangbah Conrad K Sangma, u Symbud Myntri Rangbah, Bah Sniawbhalang Dhar bad kiwei kiwei ki ophisar.
Haba ïakren bad ki briew ka Sorkar Jylla ki la ong ba ka Sorkar Jylla ka hap ban pynkhreh ïa ki jingdonkam ban jied ïa ki jaka ban pynïasoh lyngba kane ka liengsuiñ duriaw (seaplane).
Ka don ruh ka jingpyrkhat ban pynïasoh ïa ka Shillong bad Kolkata kumjuh bad ka Tura da kaba pyntreikam ïa kane ka liengsuiñ duriaw namar ka dei ruh kaba lah ban hiar ha ryngkew. Ka Sorkar Jylla ka kwah ban pyntreikam ïa kane lyngba ka skhim UDAN ha kaba ka Sorkar Pdeng kan ïarap lang ban ai ïa ka Viability Gap Funding (VGF) ban pyntreikam ïa ki liengsuiñ.
Ka kompani Spicejet ka la donbynta lang ha ka jingpyrshang ban wanrah ïa kane ka liengsuiñ duriaw.
Kane ka dei ka sien banyngkong eh ha ka Thaiñ Shatei Lam Mihngi ba ka liengsuiñ kaba hiar ha um kan treikam ha kane ka jylla bad kan ïarap ruh ban kyntiew shuh shuh ïa ki kam jngohkai ha kane ka jylla.
