Shillong, Naiwieng 15
U Vice-Chancellor ka North Eastern Hill University (NEHU), Prof. Prabha Shankar Shukla ha ka Sngi Thohdieng u la pyntip ba un shim shuti naduh ka 15 tarik haduh ka 29 tarik mynta u bnai bad u lah ruh ban bteng ïa ka shuti jong u lada donkam.
U Prof. Shukla u la leit shuti lyngba ka ‘Earned Leave’ kaba 15 sngi.
Ha ka shithi pan shuti ba la phah sha u Registrar ka skulbah, u VC u la ong, “Namar katto-katne ki daw ki bym lah kiar, ngan mih noh na ‘Campus’ lyngba ka ‘Earned Leave’ (EL) naduh mynta ka sngi (15/11/2024).” U Prof. Shukla u la ong ba ka jingshim shuti jong u kan long haduh ka 29 tarik mynta u bnai bad ka lah ruh ban jlan lada donkam.
“Ha ka jingbym don jong nga, u Professor ba la rangbah tam jong ka skulbah (Prof. N. Saha ne kiwei) kin shimti ne peit ïa ki kam jong u VC,” ong u Prof. Shukla ha ka shithi.
Ki samla pule kiba don hapdeng ka jingïakhih shah thngan ki la dawa ïa ka jinghiar shuki jong u VC bad ban weng ïa u Registrar bad Deputy Registrar nalor kiwei kiba la shah kynnoh thung kam be-aiñ ha ka skulbah.
U VC ha ka Sngi Balang u la thung ïa 2 ngut ki Pro-Vice Chancellor ba kynthup ïa ka Professor Fameline K. Marak bad Professor S.M. Sungoh na bynta ki 2 tylli ki shlem treikam ka skulbah ha Tura bad Shillong. Hynrei na ka liang ki samla pule ki la kyntait war ïa ka rai jong u VC halor ka jingthung Pro-VC ïa kitei ki 2 ngut.
Kum ban shu pynkynmaw, ka tnad pule-puthi ka Sorkar Pdeng ha ka Sngi Palei ka la thung ïa ka ‘Inquiry Committee’ ban tohkit halor ki kynrum-kynram bad ki jingkynnoh ba ka don ka jingpynïaid bakla bad ka jingbym biang ka rukom pynïaid hapoh ka NEHU, Shillong.
Ka jingïakhih shah thngan jong ki samla pule ka skulbah hapoh ka jingïalam ka North Eastern Hill University Students Union (NEHUSU) bad ka KSU-NEHU Unit ka la jam sha ka sngi ba 11 naduh ba la sdang ha ka 5 tarik mynta u bnai.
