Shillong, Naiwieng 15:
U MLA ka North-Shillong konstitwensi, Bah Adelbert Nongrum ha ka Sngi Thohdieng u la kynnoh ba ka State Executive Committee (SEC) jong ka Voice of the People Party (VPP) ka la ïaid lait na u kum u nongmihkhmat haba ïadei bad ka jingpynbna kyrtong na bynta ka ilekshon MDC ban wan.
“Wat la nga don ha ka VPP, nga ngeit ba ka seng kan sngewthuh ïa ka nongrim kaba nga don, kaba nga dei ban kren…ngan ym lah ban shu sngap namar kan pynmih bun ki jingkylli khamtam haba ïadei bad ka jingrai ïa ki kyrtong ki ban mihkhmat ha kane ka ilekshon MDC ka ban long,” ong u Bah Nongrum hadien ha ka jingïalang kaba la long Jaïaw Pdeng.
Haba kdew ba ka jinglum jingïalang jong u ka dei halor ka Jaïaw bad Mawkhar-Pynthor-umkhrah konstitwensi, u MLA u la ong ba u kwah ban pynshai sha uba bun balang kiba don hapdeng ka jingkulmar jingmut bad kiba la buh jingkylli ïa u halor kane ka bynta.
“Kumba ïa tip lang da baroh, ïa ka kyrteng jong ki 3 ngut – Bah Babet, Bah Strong (Strong Pillar Kharjana) bad Bah Nickson, nga la ai jingmut na Jaïaw konstitwensi. Ka jingai jingmut jong nga ka long kaba shai, ngam shym la ai jingmut ïa ka kyrteng ba dei ban ïoh beit ‘Mr. A’ ne ‘Mr. B’, hynrei nga ai jingmut pat ïa ka rukom ba ka State Election Committee ka dei ban rai bad ka rai ka dei ban long kaba bha tam khnang ba kan ym mih kano-kano ka jingsahnud ne jingpher jingmut hapdeng jong ngi ki para nongïalam,” u la ong da kaba bynrap ba ïa ka kyrteng jong u Bah Elias Susngi ruh u la ai jingmut lang na Mawkhar-Pynthorumkhrah konstitwensi.
Haba ban jur ba ka jinglum jingïalang jong u kam dei ba u ïaleh pyrshah la ka seng, u Bah Nongrum u la ong ba u kwah pynshai sha baroh ba ha ka 8 tarik mynta u bnai – ka sngi khot jingïalang ka State Executive Committee (ha kaba ma u ruh u don lang), haba la pule ïa ki kyrteng, la mih kynsan ka kyrteng ba na Jaïaw yn mihkhmat da u Bah D. Chen – kaba la ïaid beit sha ka State Election Committee khlem ka jingai jingmut na u kum MLA.
“U Bah Strong uba pan tiket na Jaïaw, ka kyrteng pat ka mih na Mawkhar-Pynthorumkhrah…ka long u dak jingkylli uba heh. Ngi sngewlyngngoh, sngew kyndit, ym tang ma nga, hynrei ki paidbah nongshong shnong hapoh konstitwensi kiba ieid ‘Prah’ ki kylli bad ki ong ba imat kane ka dei ka kam jong u MLA uba la ai jingmut ïa ka kyrteng jong ki,” la ong une u nongmihkhmat ka VPP da kaba bynrap ba um don eiei shimet pyrshah ïa kitei ki 2 ngut.
“Nga ong ïa ka seng ban ïa burom lang markylliang, ngi don tang 4 ngut. Ïa kito ki konstitwensi bym don nongmihkhmat, to ka dei ka jingstad jong ka State Election Committee ba ngin rai ïa ki kyrtong. Hynrei ha ki konstitwensi ba don ki nongmihkhmat, sngewbha burom bad shim lem ïa ka jingai jingmut jong ki khnang ba kin sngew ïa ka jingsngewlong trai, ngin don ka jingkitkhlieh bad ngin pyndep ban bteng ïa kata ka thong,” u la ong.
Haba pynpaw ba u tip kham bha ma u ïa la ka konstitwensi, u MLA u la ong ba lada don ka jingïamir jingmut, ka jingkren, kata kin ym mih kine kiei-kiei baroh.
“Kane baroh ka dei ka jingïaid lait jong ka SEC, ka jingñiew beiñ ïa nga kum u MLA, ka jingkheiñ poh bad ha ka 8 tarik ba ki pynbna kyrteng, nga la pyrshah bad nga la ong ba ngam pdiang ïa kane ka rai ïa ka jingleh lyndet jong ka State Election Committee bad ka State Executive Committee.,” u la ong.
U MLA u la ong ruh ba wat la u la ai jingmut ïa ka State Executive Committee lyngba ka ‘WhatsApp’ ban ym pat shim rai eiei halor kine ki 2 tylli ki konstitwensi, ha ka 11 tarik, la shim ïa ka rai kaba long lyndet ïa u.
Shuh shuh haba buh jingkylli halor kane ka bynta, u la ong, “Kumta nga kwah ba ki dkhot ruh kin shai, tang shisien ki wanrah ïa kane ka kyrteng bad ki rai bad pynskhem ruh ha kane ka sngi bad nga ong ba ngam don bynta eiei bad kane ka rai.”
“Kumta kane ka jingïalang ka long ban pynshai ïa ki dkhot, ban pynsngewthuh bad ban tei ïa ka jingshaniah jong ki nongkyrshan ba lada nga don ha ka liang synshar ne pyrshah ne ha ka seng ne khlem seng, kaei kaba lieh – kaba lieh, kaba ïong – kaba ïong,” u la ong.
