Shillong, Naiwieng 15
U Working President ka Khun Hynñiewtrep National Awakening Movement (KHNAM), Bah Thomas Passah u la ong ba ka seng mynta ka dang don hapdeng ka jingpynkhreh ïa ki mat treikam ne ki mat jingkular na ka bynta ka ilekshon MDC sha ka Ïingdorbar Thawaiñ ka Khasi Hills Autonomous District Council (KHADC).
Haba ïoh ban ïakren bad u Bah Thomas Passah, u la ong ba ka seng ka la buh hakhmat eh ïa ki katto-katne ki mat treikam kiba donkam eh. Ka banyngkong eh ka jingthmu ba ka seng ka la buh hakhmat eh ka long ba lada ki paidbah ki ai ïa ka jingshaniah ha ka seng, ka seng kan trei borbah ban pynbeit noh ïa ka hukum jong ka Presidential 1950 namar kumba ka long naduh u snem 1950 haduh mynta, ka thup jong ka Scheduled Tribe kaba dei jong ka Jylla Meghalaya ka khlem shym la don satia kano-kano ka jingpynbeit bniah naduh katei ka por.
“Katkum ka jingïohi jong ngi, ka la donkam ban pynbeit ïa kane bad ngin trei borbah ban pynurlong ïa kane ka bynta”, ong u Bah Passah.
U la ong ba ka bynta ka ba-ar ka long ba ki District Council kiba la leit, ki la sngewthuh bakla ïa ka jingthmu bad ka jingtreikam jong ka Trading by Non-Tribals 1954, ha kaba ki la mut ba ka Trading by Non-Tribals 1954 ka dei ka aiñ ban pynriewspah ïa ka District Council hynrei kim tip pat ba ka jingthmu jong kane ka aiñ hi ka dei ban ïada ïa ka khaïi-pateng jong u Khasi.
“Na ka liang jong ngi, ngin pynthikna ïa phi ba ngin pyntreikam ïa kane ka aiñ tang halor kawei ka nongrim ban ïada ïa ka khaïi ka pateng jong u Khasi ym ban pynriewspah ïa ka District Council”, ong u Bah Passah.
U Bah Passah u la ong ka bynta balai kaba long ruh ka mat ba hakhmat tam jong ka seng, ka dei ban pynskhem noh ïa ka aiñ jong u nongthep vote hapoh KHADC ha kaba uno-uno u briew uba la sah 12 snem shaneng, u lah ban long u nongthep vote ha ka MDC ilekshon bad uba thep vote ‘by default’, u lah ban long kum u kyrtong. Kumta na ka liang ka seng ruh ka la buh ïa kane ka jingdawa ha ki por kiba la dep hakhmat ka KHADC ban pyntreikam noh ïa kane ka Autonomous District Rules ha ryngkat ka jingthoh da ki kyntien kiba shai ba kiba thep vote hapoh ka KHADC, ki dei ban long tang na ka Jaitbynriew Khasi bad kiwei pat ki Jaitbynriew ki lah ban thep vote sha ki District Council jong ki hi.
“Ngi la ai da ki jingthoh kiba bun halor kane ka bynta hynrei ka khlem poi shano-shano ruh bad da kaba pynkynmaw biang ba lada ngi phai biang sha ka aiñ jong ka District Council ka Autonomous District Rules kaba 128, ka thoh ba uno-uno u briew uba la sah 12 snem shaneng, u lah ban long u nongthep vote ha ka MDC ilekshon”, ong u Bah Passah.
Shuh shuh u la ong ruh ba nalor kine ki mat jingdawa ba la buh hakhmat eh da ka seng, ki don sa kiwei de ki mat jingdawa halor kumno ban pynthikna ba lada ka seng ka ïoh jingjop bad ban ïoh bat ïa ka bor synshar hapoh ka KHADC, ka jingmyntoi kan wan hi sha u paidbah.
“Kiwei-kiwei ki mat treikam kiba kham bniah, nga tharai ha ka sngi kaba ngi pyllait ïa kane ka mat jingkular jong ngi, u paidbah un sa tip lut baroh”, bynrap u Bah Passah.
