Shillong, Naiwieng 15
U Symbud Myntri Rangbah ka Jylla, Bah Prestone Tynsong uba dei ruh u President ka NPP Meghalaya Unit u la ong ban ieid jaidbynriew dei ban ieid shwa ïa ka ïing ka sem.
U la ong ba haba ong ieid jaidbynriew dei ban sdang shwa na la ïing la sem, ki shnong ki thaw, ki district, sha ka jylla bad sha ka ri baroh kawei.
Ïa kine kyntien u la pynpaw haba ai jingkren haba pynithuh ïa u Dr. Celestine Lyngdoh, MLA Umsning sha ka seng NPP ha Umsning Block kaba long ha ka Sngi Thohdieng.
Kane ka jingkren paidbah u Bah Prestone ka dei kaba nyngkong hadien ba u la khlaiñ na ka jingshitom kaba la ban ïa u haduh b?n hap leit phah sumar sha nongbah Delhi.
Ha kane ka sngi la ïadonlang u Bah HM Shangpliang, Bah Hamlet Dohling, Bah Jason Mawlong, Bah Donkupar Sumer. Haba ai jingkren u Bah Prestone u la ong ba ka jingkhwai ka NPP ïa u Dr. Celestine Lyngdoh ka long kaba la slem bha. U la ong ruh ba ki don bun ki jingshah kren jingshah kylli halor ka jingpdiang ka seng ïa kiba wan pynïasoh, hynrei u la ong ba kata ka jingshah kren ka wanrah kaba bha suda. Kumta u la ong ba u sngewtynnad ban pdiang ïa u Dr. Celestine namar haba u kylli ïa u la u don kyndon ne em halor ka jingjied ïa u kyrtong ha ka ilekshon MDC, u la jubab ba um don eiei bad u hun beit ïa ka jingjied ka seng da kaba kdew ba u Dr. Celestine u long u briew uba kham kyrpang. Namar kata, u la kyntu ïa ki dkhot ka seng ban don ka jingïatreilang naduh ki shnat haduh ki shnong ki thaw. Nalor kane, u Bah Prestone u la ong ba ki don ki samla, ki seng bhalang ki bym sngewthuh kiba sngew ba ngi im ha Meghalaya ki mar bam ki hiar hi na bneng da kaba ki kwah ba ka jylla Meghalaya kan long laitluid.
Kumta u la kyntu ïa ki nongïalam ka seng ba ki dei ban ïohi jngai namar ki don ki khun samla kiba sngewthuh bakla kiba ong ha ri la jong leh katba mon.
U la ong ruh ba ha Garo Hills ka don ka rel ban kit mar bam bad u nong Assam um lah ban khang hynrei ha Khasi Hills ngi dang ap na ka jylla Assam.
