Nongstoiñ, Naiwieng 14
Ka jingïoh rah nam jop jong ki samla ha ka jingïakob ‘folk song group, folk dance solo bad folk song solo’ ha ka lympung State Level Youth Exchange program kaba la long ha Nongbah Shillong ha kine ki sngi ba la dep ka la wanrah nam ïa ka West Khasi Hills District hi baroh kawei.
Kine ki samla kiba la leit ban ïashim bynta ha katei ka lympung nalor ban ïoh rah ïa ka nam lahduh ïa kitei ki bynta, ki la wan ruh ha ka kyrdan kaba ar ha ka jingïakob declamation bad thoh poitri.
Shuh shuh la ong ruh kaba kham sngewtynnad ka long ba kine samla ki la ïoh ruh ïa ka jingïaroh na kiba bun ha ka jingïabeit bad ryntih jong kitei ki samla bad ar ngut napdeng jong kitei ki samla na WKHD ki la shah jied ruh ban leit mihkhmat syndon ïa ka Ri India sha ka lympung International Level kata u Samla Banraplang Wanñiang bad ka Samla Jopsilin Khardewsaw.
Kumta halor kane ka jingwanrah nam jong kitei samla ïa ka District, na ka liang ka ophis jong ka District Sport Officer (DSO) Nongstoiñ, ka la pynlong ïa ka jingïalang ban pynkup burom ïa ki bad kumjuh ïa ki nongbtin lynti ïa kitei ki samla, hapoh ka phyllaw ïingsah jong u DC ka WKHD. Ha kane ka sngi, u DC ka WKH, Bah Garod LSN Dykes u la long u kongsan ha ka jingdonlang ka Kong Balarina Syiem, DSO Nongstoiñ kiba la long ruh ki nongbei pisa kynthup lang ruh ïa u Bah Onessimus Pasi, DGP barim, Bah Banteilang Kharjana DSP, Bah Donkupar Wanñiang, bad Bah Donkupar Kharjana.
“Phi long ba donbok haduh katta-katta ban don hapoh kane ka District, ka District kaba riewspah ha ki liang baroh, la ka long ha ka liang ki sawdong-sawkun kat shaba ngi leit ka long kaba itynnad,” ong u DC.
U la ai khublei ïa baroh ki samla kynthei bad shynrang kiba la ïashim bynta ha ka youth exchange program hapoh ka District, da kaba u la ong ruh ba “Ka jingjop kaba nyngkong ka jong ngi ka long na ka jingïabun kiba wan shakhmat kiba ïashimbynta”.
“Kumta nga shim ka kabu ban pynkup burom kum ka dak jong ka jingkmen ban ai mynsiem ïa phi hynrei kam dei ban kup sarong ïa phi, to shim ïa ka burom bad to ai ba kane kan nym kiew sarong ïa phi,” ong u DC.
