Khliehriat, Naiwieng 17
Ban pyntyllun ïa ki kam ba ïadei bad ka khaïi-pateng hapoh ka thaiñ Rilum Jaiñtia, ki hynriew seng ha ka 16 tarik Naiwieng ki la thaw da ka Joint Action Committee (JAC) ha ka jingïalang kaba la long ha Community Hall Khliehriat West, East Jaiñtia Hills District.
Kine hynriew seng ki kynthup ïa ka East Jaiñtia Coal Supplier and Minerals Association, ka All Jaiñtia Cement Clinker Association, East Jaiñtia Hills Truck Owners and Transporters Association, East Jaiñtia Drivers Association, East Jaiñtia Limestone Supplier Association bad ka Jaiñtia Coal Miners and Dealers Association.
Katto-katne ki nongkitkam ba hakhmat ki long President Justine Dkhar, General Secretary Soomeyo Sayoo, Treasurer Hambertus Nongtdu, Adviser Amos Dkhar bad Deibor Sungoh.
La thung ruh ïa baroh ki President jong kitei hynriew seng kum ki Vice President kumjuh baroh ki Secretary kum ki Assistant Secretary jong ka JAC bad la jied ruh 33 ngut kum ki dkhot ka Executive Committee.
Kaba pynlong ïa ki hynriew seng ban thaw da ka JAC, ka long namar ka jingdkoh ha kiba bun bynta kaba wanrah ïa ka jingduh ïa ki nongkhaïi bad ktah ka khaïi ka pateng jong u babun balang ba ju im da ka kam khaïi-pateng. Ka thong kaba hakhmat ka long ban khanglad ïa ka jingwan tuklar ki bor kiba na bar kiba ju wan ban shim kabu ban kamai spah da kaba suk na Rilum Jaiñtia kaba dei ka thaiñ kaba ju pynmih buh bha ki mar poh khyndew, ki mar rep mar riang nalor kiwei.
